काठमाडौं । अमेरिकी राष्ट्रपति जो बाइडेन पुनः एकपटक कोरोना संक्रमित भएका छन् । उनका डाक्टरहरूले यसलाई ‘रिबाउन्ड इन्फेक्सन’ भनेका छन् ।
जो बाइडेन पहिलो पटक २१ जुलाईमा कोरोना पोजिटिभ भेटिएका थिए । त्यसबेला यो रोगको सामान्य लक्षण देखिएपछि उनको कोरोना परीक्षण गरिएको बताइएको थियो ।
तर, मंगलबार र शुक्रबारसम्म गरिएको चारवटा परीक्षणमा उनको नतिजा नेगेटिभ आएको थियो ।
शनिबार जो बाइडेनले आफूमा कुनै लक्षण नदेखिएको भएपनि वरपरका मानिसहरूको सुरक्षाका लागि अलग्गै बस्ने बताए । बाइडेनका डाक्टर केभिन ओकोनरले भनेका छन्, ‘फेरि उपचार सुरु गर्नुपर्ने अवस्था नरहेको तर राष्ट्रपतिलाई निगरानीमा राखिने छ ।’
राष्ट्रपति जो बाइडेन प्याक्सलोभिड नामक एन्टिभाइरल औषधि खाइरहेका छन् ।
