काठमाडौं । लामो समयदेखि विवादमा रहेको डेडिकेटेड र ट्रंक लाइन प्रयोग गरेको बक्यौता सरकारले १५ दिन भित्रमा उठाउने भएको छ । आइतबार बसेको मन्त्रिपरिषद्ले ‘टाइम अफ डे’ (टीओडी) मिटरको तथ्यांकको आधारमा १५ दिनभित्र डेडिकेटेड र ट्रंक लाइन प्रयोग गरेका उद्योगहरुसँग विद्युत बक्यौता उठाउने निर्णय गरेको हो ।
हाल २८ वटा उद्योगको लाइन प्राधिकरणले काटेको छ । काटिएका उद्योगहरुको लाइन पनि १५ दिन भित्र जोड्नु पर्ने भनिएको छ ।
नेपाल विद्युत प्राधिकरणले हिजो भएको मन्त्रिपरिषद्को निर्णय प्राधिरणमा आइनसकेको र निर्णय आएपछि मात्रै अगाडि बढ्ने जनाएकाे छ ।
यसभन्दा पहिले विद्युत् प्राधिकरणले ५० हजारभन्दा धेरै पेजको टिओडी मिटरको डेटा लेखा समितिलाई बुझाएको थियो । तर, उद्योगीले टीओडीको विवरण माग्दा प्राधिरणले नदिएको उद्योगहरुले बताउँदै आएका छन् ।
लामो समयदेखि उद्योगले प्रयोग गरेको विद्युतको बक्यौता उठाउने विषयमा विवाद हुँदै आएको छ ।
उद्योगीले प्रयोग नै नगरेको विद्युतको बिल पठाएको भनेर प्राधिकरणको विरोध गरिरहेका छन् । प्राधिकरणले प्रयोग गरेको विद्युतको बक्यौता उठाएरै छाड्ने बताइरहेको छ ।
प्राधिकरणले २०७२ माघदेखि २०७५ वैशाखसम्म डेडिकेटेड र ट्रंक लाइनको ८ अर्बभन्दा धेरै बक्यौता उठाउन बाँकी रहेको प्राधिरणले बताउदै आएको छ ।
