काठमाडौं । वैशाख ३० गते हुने स्थानीय तह निर्वाचनमा उम्मेदवारहरूले गर्ने खर्चको सीमा निर्वाचन आयोगले तोकिदिएको छ । शुक्रबार बसेको बैठकमा आयोगले महानगरपालिकाका मेयर र उपमेयरका उम्मेदवारले ७ लाख ५० हजार भन्दा बढी खर्च गर्न नपाउने निर्णय गरेको हो ।
त्यस्तै, नगरपालिका प्रमुख र उपप्रमुखका लागि ४ लाख ५ हजार, गाउँपालिका प्रमुख र उपप्रमुखका लागि ३ लाख ५० हजारसम्म खर्च गर्न पाउने भएका छन् भने। महानगरको वडाध्यक्षलाई ३ लाख, उपमहानगरको वडाध्यक्षलाई २ लाख ५० हजार, नगरपालिकाको वडाध्यक्षलाई २ लाख र गाउँपालिकाको वडाध्यक्षलाई डेढ लाख भन्दा बढि खर्च गर्न नपाउने आयोगले जनाएको छ ।
उम्मेदवारले मतदाता नामावली रसिद, सवारी साधन, इन्धन, प्रचारप्रसार सामग्री, ढुवानी, गोष्ठी तथा कार्यकर्ता परिचालन, प्रचारप्रसार, कार्यकर्ता सञ्चालन र विविध शीर्षकमा उम्मेदवारले तोकेको खर्च गर्न पाउनेछन् । यस्तै जिल्ला समन्वय समितिका उम्मेदवार प्रमुख र उपप्रमुखले ५० हजार र अन्य पदकाले एकमुष्ट २५ हजार रुपैयाँ खर्च गर्न पाउने पनि आयोगले जनाएको छ ।
