काठमाडों । नेपालको मुख्य प्रवेशद्वार र देशकै प्रमुख व्यपारिक नाका वीरगञ्जलाई प्रयोग गरी भारत तथा तेस्रो मुलुकतर्फ हुने नेपाली वस्तुको निर्यातमा उलेख्य वृद्धि भएको छ । गत आर्थिक वर्षको नौ महिनाको तुलनामा चालू आर्थिक बर्षको सोही अवधिमा नेपाली वस्तुको निर्यात १ सय २० प्रतिशतले बढेको हो ।
आर्थिक वर्ष २०७७÷८७ को साउनदेखि चैतसम्ममा ३१ अर्ब ७६ करोड ४६ लाख रुपैयाँ भन्दा बढी मूल्यको नेपाली वस्तु निर्यात भएको तुलनामा चालू आर्थिक बर्षको सोही अवधिमा वीरगञ्ज नाका प्रयोग गरी ३६ अर्ब ९४ करोड २१ लाख रुपैयाँ बढी अर्थात ६९ अर्ब ७० करोड ६७ लाख रपैयाँ भन्दा बढी मूल्यको नेपाली वस्तु निर्यात भएको छ । यो गत आर्थिक बर्षको तुलनामा १ सय १९.५६ प्रतिशत बढी हो ।
वीरगन्ज नाका प्रयोग गरी भारत तथा तेस्रो मुलुकतर्फ निकासी हुने मुख्य वस्तुमा भटमासको प्रशोधित तेल, प्रशोधित पाम आयल, फलफूलको जुस, सूर्यमुखीको प्रशोधित तेल, दालमोठ कपडा लगायतका वस्तु रहेको वीरगञ्ज भन्सार कार्यालयका सूचना अधिकारी सुमित गुप्ताले जानकारी दिए । उनले वीरगञ्ज नाका प्रयोग गरी भारत तथा तेस्रो मुलकतर्फ हुने नेपाली वस्तुकोे निर्यात बढेसँगै यसको सकारात्मक प्रभाव वीरगञ्ज भन्सार कार्यालयको राजस्व सङ्कलनमा परेको बताए ।
गत आर्थिक वर्षको पहिलो नौ महिनाको तुलनामा चालु आर्थिक बर्षको सोही अवधिमा करिब २५ प्रतिशत बढी राजस्व सङ्कलन भएको छ । गत आर्थिक वर्षको पहिलो नौ महिनामा १ खर्ब २४ अर्ब ७७ करोड ५२ लाख रुपैयाँ राजस्व सङ्कलन भएको तुलनामा ३० अर्ब ६० करोड ७७ लाख रुपैयाँ बढी अर्थात् १ खर्ब ५५ अर्ब ३८ करोड २९ लाख रुपैयाँ राजस्व सङ्कलन गर्न सफल भएको वीरगञ्ज भन्सारले जनाएको छ ।
