काठमाडौं । बैशाख ३० गते हुने स्थानीय निर्वाचनका लागि अर्थ मन्त्रालयले निर्वाचन आयोगलाई ८ अर्ब ११ करोड बजेट दिएको छ । आयोगले मन्त्रालयबाट सो बराबरको बजेट दिने सुनिश्चितता प्राप्त भएको जानकारी दिएको हो ।
सरकारले स्थानीय निर्वाचनको मिति घोषणा गरेपछि आयोगले निर्वाचन तयारीका लागि सरकारसँग १२ अर्ब रुपैयाँ बजेट माग गरेको थियो । अर्थ मन्त्रालयले आयोगले मागेभन्दा झन्डै एक तिहाइ रकम कटौती गरेर बजेट दिएको हो । अब आयोगले निर्वाचनका लागि आवश्यक सामानहरुको खरिद प्रक्रिया अघि बढाउनेछ ।
आयोगले निर्वाचनमा भाग लिने राजनीतिक दलले नाम फागुन २६ गते भित्र प्रकाशन गर्ने जनाएको छ । अहिले ८० वटा राजनीतिक दलले निर्वाचनमा भाग लिने प्रयोजनका लागि दल दर्ता गराएका छन् । ती नामहरुमाथि छानबिन भइरहेको आयोगले जनाएको छ ।
आयोगले मतदाता नामावलीमा नाम भएका व्यक्तिहरुका हकमा नामावलीमा भएका त्रुटी सच्याउन निवेदन दिने, दोहोरो नामावली हटाउने कामहरु आगामी साता गर्ने जनाएको छ ।
स्थानीय तह निर्वाचनका लागि जिल्ला जिल्लामा खटिने मुख्य निर्वाचन अधिकृत र निर्वाचन अधिकृतको नामावाली न्याय सेवा आयोगबाट प्राप्त भएको समेत आयोगले जनाएको छ ।
