काठमाडौं । नेपालमा एलपी ग्यासको आपूर्ति सहज बनाउन भारतबाट ठूलो परिमाणमा ग्यास भित्रिए पनि बजारमा उपभोक्ताले सहज रूपमा सिलिन्डर पाउन सकेका छैनन् ।
नेपाल आयल निगमको तथ्यांकअनुसार भदौ २५ र २६ गते गरी दुई दिनमा विभिन्न नाकाबाट ४ हजार ९ सय ०.२ मेट्रिक टन एलपी ग्यास आयात भएको छ । यो परिमाण करिब ३ लाख ४५ हजार ८५ सिलिन्डर बराबर हो ।
भदौ २५ गते मात्रै ३ हजार ७७.९ मेट्रिक टन अर्थात् करिब २ लाख १६ हजार ७५४ सिलिन्डर ग्यास आयात भएको थियो । त्यसको भोलिपल्ट भदौ २६ गते १ हजार ८२२.३ मेट्रिक टन अर्थात् करिब १ लाख २८ हजार ३३२ सिलिन्डर ग्यास नेपाल भित्रिएको निगमको विवरणमा उल्लेख छ ।
दुई दिनको आयातमध्ये सबैभन्दा ठूलो हिस्सा वीरगन्ज नाकाको रहेको छ । वीरगन्जबाट मात्रै २ हजार ९२६.११ मेट्रिक टन ग्यास आयात भएको छ ।
यस्तै, भैरहवा नाकाबाट ७०२.५९ मेट्रिक टन, विराटनगरबाट ६५१.६३ मेट्रिक टन, नेपालगन्जबाट ५३०.८३ मेट्रिक टन र मेची नाकाबाट ८९.०४ मेट्रिक टन ग्यास भित्रिएको छ । धनगढी नाकाबाट भने ग्यास आयात भएको छैन । निगमको विवरणमा धनगढीमा मालवाहक गाडी प्रवेश नगरेको उल्लेख छ ।
निगमले विभिन्न नाकाबाट भइरहेको आयातले बजारमा एलपी ग्यासको आपूर्ति सहज बनाउन सहयोग पुग्ने जनाएको छ । तर, ग्यासको आयात बढे पनि उपभोक्ताले भने अभावको सामना गरिरहेका छन् ।
बजारमा सिलिन्डरको अभावसँगै ग्यास लिन आवश्यक कुपनसमेत पाउन कठिन भएको उपभोक्ताहरूको गुनासो छ । आयात भएको ठूलो परिमाणको ग्यास बजारसम्म पुगेर उपभोक्ताले सहज रूपमा पाउने अवस्था कहिले बन्छ भन्नेमा भने अझै प्रश्न कायमै छ ।
