काठमाडौं । ३३ किलो सुन तस्कर प्रकरणका मूख्य योजनाकार चुडामणि उप्रेती ‘गोरे’लाई मोरङ जिल्ला अदालतले जन्मकैदको सजाय सुनाएको छ ।
न्यायाधीश भरत लम्सालको इजलासले मंगलबार सनम शाक्य हत्याकाण्ड र ३३ किलाे सुन तस्कर प्रकरणमा मुख्य भूमिकामा रहेका मोरङ उर्लाबारीका गोरेलाई उक्त सजाय सुनाएको हो।
गोरेसहित टेकराज मल्ल ठकुरी, लाक्पा शेर्पा, मोहन काफ्ले, कृष्ण भनिने नरेन्द्र कार्की र भोजे मामा भनिने भोजराज भण्डारीलाई जन्मकैदको फैसला सुनाइएको हो ।
अदालतले राजन कुमारलाई तीन वर्ष र माधव भनिने मदनप्रसाद घिमिरेलाई छ महिना कैद सजायको फैसला गरेको स्रेस्तेदार राणाले बताए । मुद्दाका ७७ जनालाई प्रतिवादी बनाइएकामा ४८ जनाले सफाइ पाएका छन् भने २१ जना फरार रहेकाले मुद्दा मुल्तवीमा राखिएको उनले जानकारी दिए ।
