काठमाडौं । नेपाल प्रहरीले एकैदिन नौ सय ग्राम पहेँलो धातु बरामद गरेकाे छ । त्रिभुवन अन्तर्राष्ट्रिय विमानस्थल सुरक्षा कार्यालयबाट खटिएको प्रहरीले विमानस्थलबाट ८ सय ९९ दशमलव ५ ग्राम पहेँलो धातुसहित २ जनालाई पक्राउ गरेको हो ।
विमानस्थलको अन्तर्राष्ट्रिय उडानतर्फको आगमन पार्किङ एरियाबाट आइतबार ती व्यक्तिहरुलाई पक्राउ गरेको हो । पक्राउ पर्नेहरुमा सिन्धुपाल्चोकका समुन्द्र दंगाल र संखुवासभा सन्तवीर राई रहेका प्रहरीले जनाएको छ । पक्राउ परेका दुई जनाको साथमा ३ थान बाला (करिब डेढ सय ग्राम) बरामद गरेको छ । बाँकी साढे ७ सय ग्राम भने अन्य यात्रीबाट बरामद गरिएको छ ।
सिंगापुर एयरलाइन्सको उडानद्वारा मलेसियाबाट सिंगापुर हुँदै काठमाडौं आएका यात्रुहरुलाई भन्सार छली गर्न उक्त परिमाणको धातु बोकाई लुकाएर लैजान लागेको अवस्थामा प्रहरीले दंगाललाई पक्राउ गरेको थियो । थप सोधपुछको क्रममा उक्त कार्यमा राई समेतको संलग्नता रहेको भन्ने खुलेपछि उनलाई समेत पक्राउ गरिएको हो ।
यात्रुबाट बरामद गरिएका साढे सात सय ग्राममध्ये १४ थान बाला र १ थान सिक्री रहेको छ । प्रहरीले त्यसरी सामान ल्याउने शंकास्पद १५ जना यात्रुहरुलाइ नियन्त्रणमा लिएको छ ।
