काठमाडौँ । सरकारले विभिन्न क्षेत्रमा योगदान दिएकालाई दिने विभुषण सिफारिस गर्न ठुलो दवाब आउने पूर्व मुख्यसचिव लिलामणि पौड्यालले बताएका छन् । आइतबार सामाजिक सञ्जालमा लेख्दै उनले विभुषण सिफारिसका लागि ठुलो दवाब र डरत्रास दिइने बताएका हुन् ।
पौड्याल २०६८ सालमा नेपाल सरकारका मुख्यसचिव थिए । सो बेला सबै मन्त्रालयबाट आएको ३ सय २० जनाको सिफारिस खारेज गरेका उनले पदक दिँदा राष्ट्रले गौरव गर्न लायक काम गरेका व्यक्तिलाई कारणसहित सिफारिस गर्नुपर्ने बताए । विवादको कारण त्यो वर्ष पदक वितरण भएन ।
मुख्यसचिव हुँदा राष्ट्रले गौरव गर्नलायक काम गरेका कृष्णप्रसाद भट्टराईसहित १३ जनाको मात्र नाम सिफारिस गर्दा २ घण्टासम्म बयान दिनुपरेको पौड्यालले बताए ।
संविधान दिवसको अवसरमा आज सरकारले विभिन्न क्षेत्रका व्यक्तित्वलाई पदक प्रदान गरेको छ । सधैँजस्तो यो वर्षको पदक वितरण पनि विवाद रहित बन्न सकेन । नाम घोषणा गरेका केहीले पदक लिन अस्वीकार गरिसकेका छन् ।
आफु जथाभावि पदक वितरण गरिने प्रथाको विरोधमा रहेको उनले लेखेका छन् ।
