काठमाडौँ । नेपाली सेनाको ४४ औँ प्रधानसेनापतिको रुपमा प्रभुराम शर्माले पद तथा गोपनीयताको शपथ लिएका छन् । विहीबार राष्ट्रिपति भवन शीतल निवासमा राष्ट्रपति विद्यादेवी भण्डारीसमक्ष शर्माले शपथ लिएका हुन् ।
कार्यक्रममा राष्ट्रपति भण्डारीले शर्मालाइ महारथीको दज्र्यानी चिह्न प्रदान गरेकी छन् । यससँगै शर्माले आजैबाट तीनवर्षे कार्यकालको नेतृत्व सम्हाल्नेछन् ।
समारोहमा प्रधानमन्त्री एवं रक्षामन्त्री शेरबहादुर देउवा, प्रधानन्यायाधीश चोलेन्द्रशम्शेर राणा, सभामुख अग्निप्रसाद सापकोटा र राष्ट्रियसभा अध्यक्ष गणेशप्रसाद तिमिल्सिना उपस्थित भएका थिए ।
शर्मालाई सरकारको सिफारिशमा राष्ट्रपति भण्डारीले भदौ ११ गतेदेखि लागू हुने गरी प्रधानसेनापतिमा नियुक्त गरेकी थिइन् ।
नवनियुक्त प्रधानसेनापति शर्माको सम्मानमा सैनिक टुकडीले प्रधानसेनापति सम्मान गारत अर्पण गर्नेछ । आजै पदबहाली, रथीवृन्दलाई सम्बोधन तथा सैनिक मञ्च टुँडिखेल र छाउनी पुगेर वीर सैनिकप्रति पुष्पहार अर्पण गर्ने नवनियुक्त प्रधानसेनापति शर्माको कार्यक्रम छ ।
