काठमाडौ । तपस्वीको भेषमा विभिन्न ठाउँमा आश्रम खोल्दै आएका रामबहादुर बमजनलाई प्रहरीले पक्राउ गरेको छ । बमजनलाई मंगलबार केन्द्रीय अनुसन्धान ब्युरोको टोलीले राजधानीको बुढानिलकण्ठबाट पक्राउ गरेको हो।
सिआइबी प्रमुख किरण बज्राचार्यका अनुसार, बमजन केही समयदेखि त्यहाँ छन् भन्ने सूचना प्राप्त भएपछि प्रहरीले निगरानी बढाएको थियो । कुनै बेला ‘लिटल बुद्ध’ भनी प्रचारित बम्जन पाँच वर्षदेखि सम्पर्कविहिन थिए । उनको खोजीमा सीआईबीको टोली ४ असार २०७७ मा तालिम प्राप्त कुकुरसहित सिन्धुलीको आश्रम पुगेको थियो । बमजन फेला नपरेपछि प्रहरी रित्तो हात फर्किएको थियो ।
बम्जनमाथि २० साउन २०७३ मा बाराको आश्रममा आएका तीन युवतीलाई प्रलोभनमा पारेर यौनशोषण र बलात्कारपछि बेपत्ता गरेको आरोप छ । त्यही आरोपको तीन वर्षपछि सर्लाही प्रहरीमा पीडित परिवारले किटानी जाहेरी दिएका थिए ।
जाहेरीपछि पनि पक्राउ नपरेका बम्जनलाई जिल्ला अदालत सर्लाहीले हाजिर हुन ३५ दिने म्यादसमेत दिएको थियो । तर, म्याद नाघ्दा पनि बम्जन अदालतमा हाजिर भएनन् ।
सर्लाही अदालतले २०७६ माघमा पहिलो पटक उनीविरुद्ध पक्राउ पुर्जी जारी गरेको थियो । प्रहरीले बम्जनका आश्रमहरूबाट यसअघि शव गलाउन प्रयोग गरिएका नुनका ढिकाहरू बरामद गरेको थियो । बम्जनमाथि सर्लाही, नुवाकोट र मकवानपुरबाट आश्रम आएका तीन युवतीलाई बलात्कार गरेको आरोप समेत लागेको छ ।
