गलेश्वर । जिल्ला मालपोत कार्यालय म्याग्दीले गत आर्थिक वर्षमा २ करोड ६२ लाख १९ हजार ७ सय ७५ रुपैयाँ राजश्व सङ्कलन गरेको छ ।
यो आर्थिक वर्ष २०७६/७७ को तुलनामा ३० दशमलव ५१ प्रतिशत बढी हो । आर्थिक वर्ष २०७६/७७ मा कार्यालयले ८० लाख रुपैयाँ राजश्व सङ्कलन गरेको जिल्ला मालपोत कार्यालय म्याग्दीले जनाएको छ ।
सङ्कलित राजश्वमा घरजग्गा रजिष्ट्रेसन शुल्कबाट २ करोड ३८ लाख ६५ हजार ९ सय ५७ रुपैयाँ र नगर सुधार कोषबाट २३ लाख ५३ हजार ५ सय १८ रुपैयाँ रहेको कार्यालयका लेखापाल दीपक खत्रीले जानकारी दिए। उनका अनुसार सेवाग्राहीबाट धितो रोक्का, संशोधन, घर कायम, नामसारी, विलम्व शुल्कलगायतका सेवाबापत सो रकम सङ्कलन भएको हो ।
रजिष्ट्रेसन शुल्कअन्तर्गत सङ्कलित कूल राजश्वमध्ये ४० प्रतिशत प्रदेश र ६० प्रतिशत सम्बन्धित स्थानीय सरकारलाई पठाउने प्रावधान छ । सोही अनुसार जग्गा रजिष्ट्रेसनबापत सङ्कलित रकम प्रदेश र स्थानीय तहमा बाँडफाँट गरिएको मालपोत अधिकृत कृष्ण कार्कीले जानकारी दिए ।
