काठमाडौं । एनआईशी एशिया बैंकको स्वामित्वमा रहेको विभिन्न ३ वटा कम्पनीको ७ लाख कित्ता भन्दा बढी शेयर लिलामीमा राखिएको छ । सो बैंकको नाममा रहेको मेरो माइक्रोफाइनान्स, नागरिक लगानी कोष र आरएमडीसी लघुवित्त वित्तीय संस्थाको गरी कुल ७ लाख ४९ हजार ९ सय ७३ कित्ता शेयर लिलामीमा राखिएको हो ।
यसमध्ये मेरो मेरो माइक्रोफाइनान्सको ८९ हजार ४ सय ३९ कित्ता, नागरिक लगानी कोषको ३ लाख ५० हजार ३ सय ६९ कित्ता तथा आरएमडीसी लघुवित्तको ३ लाख १० हजार १ सय ६५ कित्ता शेयर छन् ।
न्यूनतम मूल्य कति ?
एनआईशी एशियाले नागरिक लगानी कोषको संस्थापक शेयर न्यूनतम १ हजार ४ सय ६३ रुपैयाँ तोकेको छ । यसका लागि विद्यमान संस्थापक शेयरधनी मात्रै आवेदन दिन योग्य हुनेछन् ।
आरएमडीसी लघुवित्तको शेयरका लागि न्यूनतम ५ सय ६ रुपैयाँ मूल्य तोकिएको छ । मेरो माइक्रोफाइनान्सका लागि भने ५ सय ९५ रुपैयाँ न्यूनतम मूल्य तोकिएको छ । सो मूल्य नघट्ने गरी लिलाम बढाबढमा शेयर बिक्री गर्ने जनाइएको छ । यी दुवैको शेयर खरिदका लागि विद्यमान संस्थापक शेयरधनी र साधारण शेयरधनी दुवै योग्य हुनेछन् । तर, बाँडफाँडका क्रममा संस्थापक शेयरधनीलाई पहिलो प्राथमिकता दिने जनाइएको छ ।
यो शेयर बिक्रीका लागि एनआईशी एशिया क्यापिटलले बिक्री प्रबन्धकको काम गरेको छ । इच्छुक व्यक्तिले एनआईशी एशिया क्यापिटलमा गएर आवेदन दिन सक्ने जनाइएको छ ।
