काठमाडौं । आर्थिक वर्षको अन्त्य हुनै लाग्दा लामो समयदेखि मर्जर तथा एक्विजिसन प्रक्रियामा रहेका बैंक तथा वित्तीय संस्थाहरु धमाधम एकीकृत कारोबार गर्ने तयारीमा जुटेका छन् । मर्जरको प्रक्रियामा रहेकामध्ये ८ बैंक तथा वित्तीय संस्थाले यस्तो मिति तय गरेका हुन् ।
नबिल बैंक र युनाइटेड फाइनान्सबीच एक्विजिसन असार २७ गते टुंगिदैछ । दुई संस्थाबीच आइतबार एकीकृत कारोबार हुन लागेको हो । युनाइटेड फाइनान्सको १०० कित्ता बराबर नबिल बैंकको ३५ कित्ता शेयर रहेनेगरी दुई संस्थाबीच एक्विजिसन हुन लागेको हो ।
सिटिजन्स बैंक र सिर्जना फाइनान्सबीचको चलिरहेको एक्विजिसन प्रक्रियाले भोलि पूर्णता पाउँदैछ । यी दुई संस्थाबीच शनिबारको लागि एकीकृत कारोबारको मिति तय गरिएको छ । मर्जरपछि बनेको संस्था सिटिजन्स बैंक इन्टरनेशनल लिमिटेडकै नामबाट कारोबार हुनेछ । सिटिजन्स बैंकले सिर्जनाको शेयरलाई १०० : ९५ अनुपातमा मर्जर गर्न लागेको हो ।
नेपाल फाइनान्स र ललितपुर फाइनान्स फाइनान्सबीचको मर्जर प्रक्रिया पनि आइतबार पूरा हुँदैछ । दुई संस्थाले आइतबारदेखि एकीकृत कारोबार गर्न लागेको हो । सिस्टम एकीकरणको लागि भन्दै दुवै संस्थाले शुक्रबार र शनिबारको लागि बैंकिङ कारोबार बन्द गर्ने भएका छन् । दुई संस्थाबीच १ : १ को स्वाप रेसियोमा मर्जर हुन लागेको हो ।
उता, नेशनल माइक्रोफाइनान्स र महिला सहयात्रा लघुवित्त वित्तीय संस्थाबीच ३० गते एकीकृत कारोबारको तयारी गरिएको छ । महिला सहयात्रा नेशनल माइक्रोफाइनान्समा विलय हुनेगरी यसअघि सहमति भएको थियो । दुई संस्थाबीचको एकीकृत कारोबारपछि नेशनल माइक्रोफाइनान्स वित्तीय संस्थाको नामबाट एकीकृत कारोबार हुनेछ । नेशनल र महिलाबीच १०० : ६८ अनुपातको स्वाप रेसियोमा कारोबार हुन लागेको हो ।
यी सबै मर्जर तथा एक्विजिसनलाई राष्ट्र बैंकले यसअघि नै अन्तिम स्वीकृति प्रदान गरिसकेको छ ।
