काठमाडौं । सञ्चित नाफा सकिएर भारतीय आयल कर्पोरेसन (आईओसी) लाई तिर्ने पैसा नभएपछि नेपाल आयल निगमले मूल्य स्थिरीकरण कोषको रकम चलाएको छ ।
निगम अन्तर्गतको मूल्य स्थिरीकरण कोष सञ्चालक समितिको बैठकले आईओसीलाई भुक्तानी गर्न अपुग हुने १ अर्ब ८८ करोड रुपैयाँ झिक्ने निर्णय गरेको हो ।
निगमले आईओसीलाई पर्सि आइतबार १३ अर्ब रुपैयाँ भुक्तानी गर्दैछ । त्यसमध्ये १ अर्ब ८० करोड कोषबाट भुक्तानी गर्न लागिएको निगमका प्रवक्ता विनितमणि उपाध्यायले जानकारी दिए ।
कोषमा यसअघि ८ अर्ब रुपैयाँ थियो । त्यसमध्ये १ अर्ब ८० करोड रुपैयाँ भुक्तानी भएपछि अब ६ अर्ब २० करोड बाँकी रहन्छ ।
