सर्लाही । सर्लाहीको धनकौलस्थित अन्नपूर्ण चिनी मिल यो वर्ष पनि सञ्चालन नहुने भएको छ । यस जिल्लाको इन्दुशंकर चिनी उद्योग, हरिवन र महालक्ष्मी चिनी उद्योग, बगदहले उखु क्रसिङ गरिरहँदा अन्नपूर्ण चिनी उद्योग भने सञ्चालनको कुनै तयारी छैन । उद्योग परिसर सुनसान छ ।
नेपाल उखु उत्पादक महासंघका अध्यक्ष कपिलमुनि मैनालीले किसानलाई लिएर उद्योगमा पुग्दा यो वर्ष पनि उद्योग सञ्चालनको कुनै तयारी नभएको पाइएको बताए ।
किसानको भुक्तानी दिन नसक्दा गत वर्ष पनि यो उद्योग सञ्चालन भएन । यो उद्योगले अझै ६५ लाख रुपैयाँभन्दा बढी रकम किसानलाई भुक्तानी गर्न बाँकी रहेको त्यहाँ कार्यरत कर्मचारीले बताएको महासंघका अध्यक्ष मैनालीले जानकारी दिए ।
उद्योगका मालिक राकेश अग्रवालले उद्योग नै बिक्री गरिसकेका र नामसारीमा समय लागिरहेकाले उद्योग सञ्चालन हुन नसकेको बताइएको छ ।
