काठमाडौं । बैंक तथा वित्तीय संस्थाबाट १८ हजार नागरिकले डलर कार्ड लिएका छन् । नेपाल राष्ट्र बैंकले मंसिर मसान्तसम्म १८ हजार १ सय ११ जना नेपालीले विभिन्न बैंकबाट डलर कार्ड लिएको जनाएको हो ।
राष्ट्र बैंकले अघिल्लो चैतदेखि डलर कार्ड लिएर वार्षिक ५ सय डलरसम्मको विदेशी वस्तु तथा सेवाको खरिद गरी भुक्तानी गर्नसक्ने सुविधा दिएको थियो । सो सुविधा प्रयोग गरेका नागरिकले हालसम्म ३९ लाख अमेरिकी डलर कार्डमा लोड गरेका छन् ।
नेपाल राष्ट्र बैंक विदेशी विनिमय विभागका कार्यकारी निर्देशक रामु पौडेलले ३९ हजार डलर लोड भए पनि १८ हजार डलर जति मात्रै खर्च भएको बताए । ‘यो मंसिर मसान्तसम्मको तथ्यांक हो, पुसको एक सातामा केही बढेको भए पनि २० हजार नाघेको छैन होला,’ उनले भने ।
कहाँ कहाँ हुन्छ खर्च ?
राष्ट्र बैंकले यसरी कार्डबाट कहाँ खर्च हुने गरेको छ भन्ने रेकर्ड समेत बैंकहरुसँग माग्ने गरेको छ । जसअनुसार हालसम्म कार्डबाट भुक्तानी गर्नेले अनलाइन किताव तथा जर्नलहरु किन्न तथा केही सामाजिक सञ्जालमा विज्ञापनका लागि भुक्तानी गरेको पाइएको छ ।
‘हामीले कार्डबाट हुने खर्च कहाँ हुँदो रहेछ भनेर ट्रेस गर्ने गरेका छौं’, पौडेलले भने, ‘अहिलेसम्म धेरै नचाहिने क्षेत्रमा खर्च भएको छैन । यो धेरै रकम पनि होइन ।’ उनले नेपाल सँधैं पुरानै सिस्टममा बस्न नसक्ने भन्दै अहिले राष्ट्र बैंकले ल्याएको नीति ठीक भएको समेत बताए ।
