काठमाडौं । चालू आर्थिक वर्षको पहिलो ६ महिनामा ४७ हजार ५० किलो राहदानी (पासपोर्ट) आयात गरिएको छ । भन्सार विभागले सार्वजनिक गरेको तथ्यांकमा यस्तो स्थिति देखिएको हो ।
उक्त परिमाण बराबरको पासपोर्ट आयात गर्न १ अर्ब ४१ करोड ५१ लाख १४ हजार रुपैयाँ खर्च भएको विभागको तथ्यांकमा जनाइएको छ ।
विदेशिए करिब ४ लाख नेपाली
साउनदेखि पुससम्मको अवधिमा करिब डेढ अर्ब रकम बराबरको पासपोर्ट आयात हुँदै गर्दा रोजगारीका लागि विदेशीने नेपालीको संख्या करिब ४ लाख पुगेको छ । वैदेशिक रोजगार विभागका अनुसार सो अवधिमा रोजगारीका लागि ३ लाख ९३ हजार ६७ जनाले श्रम स्वीकृति लिएका हुन् ।
६ महिनाको तथ्यांक हेर्दा मासिक साढे ६५ हजार युवा कामको खोजीमा विदेश उड्ने गरेको देखिएको छ । विभागका अनुसार पुस २०८१ मा मात्र ६७ हजार २ सय ५८ युवाले श्रम स्वीकृति लिएका छन् । तीमध्ये ७ हजार १ सय ५ महिला छन् ।
पुस मसान्तसम्म २ लाख २५ हजार ६ सय २५ नयाँ श्रम स्वीकृति र १ लाख ६२ हजार ६ सय २८ पुनः श्रम स्वीकृतिमा विदेश गएका छन् ।
