काठमाडौं । सर्वोच्च अदालतको आदेशपछि ५ सदस्यीयमा खुम्चिएको मौजुदा मन्त्रिपरिषद्का सदस्यहरुलाई २२ वटा मन्त्रालयको बाँडफाँड गरिएको छ ।
प्रधानमन्त्री केपी शर्मा ओलीको सिफारिस बमोजिम राष्ट्रपति विद्याददेवी भण्डारीले २२ मन्त्रालय ५ जनाको जिम्मेवारी तोकेकी हुन् ।
नयाँ जिम्मेवारी अनुुसार प्रधानमन्त्री ओलीले रक्षा र परराष्ट्र मन्त्रालय लिएका छन् । त्यस्तै उपप्रधानमन्त्री समेत रहेका विष्णु पौडेललाई अर्थका साथै उद्योग, वाणिज्य तथा आपूर्ति, ऊर्जा जलस्रोत तथा सिंचाई र गृह मन्त्रालय हेर्ने जिम्मेवारी दिइएको छ ।
त्यस्तै, शिक्षामन्त्री रहेका कृष्णगोपाल श्रेष्ठ लाई वन तथा वातावरण, युवा तथा खेलकुद, श्रम रोजगार तथा सामाजिक सुरक्षा र स्वास्थ्य तथा जनसंख्या मन्त्रालय हेर्ने जिम्मेवारी दिइएको छ ।
भौतिक पूर्वाधारमन्त्री रहेका वसन्त नेम्वाङलाई कृषि तथा पशुपन्छी विकास, खानेपानी, सञ्चार तथा सूचना प्रविधि र शहरी विकास को जिम्मेवारी थपिएको छ ।
कानूनमन्त्री लीलानाथ श्रेष्ठको भागमा भूमि व्यवस्था सहकारी तथा गरिबी निवारण, महिला बालबालिका तथा ज्येष्ठ नागरिक, संस्कृति पर्यटन तथा नागरिक उड्डयन र सङ्घीय मामिला तथा सामान्य प्रशासन मन्त्रालय हेर्ने जिम्मा दिइएको छ ।
