काठमाडौं । आजदेखि समय सकिने भएपछि १७ जिल्लाले सोमबार निषेधाज्ञाको समय थपेका छन् । काठमाडौं उपत्यकासहित विभिन्न जिल्लाले आजदेखि लागुुु हुनेगरी एक साताको समय थपेका हुन् । बाँकी जिल्लामा निषेधाज्ञाको समय बाँकी नै छ ।
गृह मन्त्रालयले जनजीवनलाई सहुज हुनेगरी खुकुलो निषेज्ञा कायमै राख्न दिएको निर्देशनका आधारमा प्रशासनहरुले समय थपेका हुन् । गृह मन्त्रालयका अनुसार काठमाडौँ, ललितपुर र भक्तपुरका साथै बागलुङ, डडेलधुरा, उदयपुर, कालीकोट, स्याङ्जा, कपिलवस्तु, ताप्लेजुङ, पूर्वी नवलपरासी, तनहुँ, बारा, इलाम, अछाम, पाँचथर र मुस्ताङमा असार ७ सम्मका लागि निषेधाज्ञा लम्ब्याइएको छ ।
काठमाडौँ उपत्यकालगायत तराईका जिल्लाहरूमा पाँच सय र पहाडी जिल्लाहरूमा दुई सय सक्रिय सङ्क्रमित भएसम्म निषेधाज्ञा जारी गर्न निर्देशन दिएको थियो । सोही निर्देशनअनुसार ७७ जिल्लामध्ये ७५ जिल्लामा निषेधाज्ञा जारी गरिएको हो ।
अधिकांश जिल्लामा रोपाइँ सुरु भएकाले कृषिजन्य वस्तु तथा सामग्री आपूर्तिमा सहजीकरण गरिएको छ । दार्चुलामा असार १० गते, पर्सामा ६ गते, गोरखामा ५ गते, चितवनमा ३ गते, रामेछाप २ गते, हुम्ला २ गते, धनकुटा ३ गते र भोजपुरमा २ गतेसम्म यसअघि लगाइएको निषेधाज्ञा कायमै छ । ती जिल्लाहरूमा पनि एक साता थपेर निषेधाज्ञा लम्ब्याएर सार्वजनिक सेवा खुकुलो बनाइने योजना छ ।
