काठमाडौं । वाणिज्य आपूर्ति तथा उपभोक्ता संरक्षणले सोमबार १९ फर्ममाथि अनुगमन गरेको छ । सोमबार बजार अनुगमनको क्रममा विभागले कस्मेटिक, इलेक्ट्रिकल/इलेक्ट्रोनिक्स, किराना पसल, गिफ्टका सामानका पसल र अन्य पसललाई कारवाही गरेको हो ।
विभागको संयुक्त अनुगमन टोलीले बिल बिजक, दर्ता प्रमाण–पत्र राख्नु पर्ने नराखेको र दर्ता प्रमाण पत्र नराखेको गुणस्तर, परिमाण, मुल्य, नापतौलमा हेरफेर गरेको र अनुगमनको क्रममा असहयोग गरेको अभियोगमा सम्बन्धित पसलबाट यो परिमाणमा आर्थिक जरिवाना गरेको हो ।
सोमबार १९ वटा व्यापारिक प्रतिष्ठानमा अनुगमन गरिएको थियो । यसमध्ये कैफियत भेटिएको ८ व्यापारिक प्रतिष्ठानलाई जरिवानाको दायरामा ल्याइएको छ भने अन्यलाई सुधार गर्न निर्देशन दिइएको छ ।
विभागले भोटेवहालमा रहेको ३ वटा र काठमाडौंमा रहेको एक इलेक्ट्रिकल ÷ इलेक्ट्रोनिक्स पसललाई १०÷१० हजार रुपैयाँका दरले जरिवाना गरेको छ भने काठमाडौंमा रहेको खाद्य वस्तु पसललाई १० हजार रुपैयाँ जरिवाना गरेको छ । विभागले असनमा रहेको अन्य पसललाई १० हजार र असनमै रहेको गिफ्टका सामान २० हजार रुपैयाँ जरिवाना गरेको छ ।
त्यस्तै, काठमाडौंमा रहेको विविध पसललाई ५ हजार रुपैयाँ जरिवाना गरेको छ । नियमित अनुगमनका क्रममा विभागले विभिन्न पसललाई कागजातसहित विभागमा उपस्थित हुन भनेको छ भने कतिपयलाई सामान्य निर्देशन दिएको छ ।
