काठमाडौं । त्रिभुवन विमानस्थल वरिपरी चङ्गा, ड्रोन र बेलुन उडाउन नपाइने भएको छ । नेपाल नागरिक उड्डयन प्राधिकरण अन्तर्गतको विमानस्थल नागरिक उड्डयन कार्यालयले शुक्रबार सूचना जारी गर्दै विमानस्थल आसपासमा चङ्गा, ड्रोन, बेलुनलगायत नउडाउन आग्रह गरेको हो ।
सूचनामा उडान तथा अवतरणको समयमा पटक–पटक चङ्गा, ड्रोन, बेलुन उडाउने गरेको पाइएको र यसबाट उडान सुरक्षामा गम्भीर असर पर्न सक्ने उल्लेख गर्दै त्यसतर्फ सचेत रहन अनुरोध गरेको हो । चङ्गा, ड्रोन, बेलुन, लेजर लाइटले उडान सुरक्षामा पार्ने जोखिमतर्फ ध्यान दिएर यस्ता गतिविधि नगर्न र नगराउन सम्बन्धित सबैलाई सूचनामार्फत सूचित गरिएको छ ।
साथै प्राधिकरणले अटेर गरी यस्ता काम गरेमा कानुनअनुसार कडा कारबाही गर्ने चेतावनीसमेत दिएको छ ।
