काठमाडौं । बैंक तथा वित्तीय संस्थाहरुको निक्षेप एकैदिन १० अर्ब रुपैयाँले बढेको छ । नेपाल राष्ट्र बैंकको विवरण अनुसार असार १९ गते बैंकहरुको निक्षेप सो रकम बराबर बढ्न पुगेको हो ।
असार १८ गते ५६ खर्ब २० अर्ब रुपैयाँ रहेको निक्षेप १९ गते १० अर्बले बढेर ५६ खर्ब ३० अर्ब पुगेको राष्ट्र बैंकले जनाएको छ । सोही समयमा वाणिज्य बैंकहरुको निक्षेप पनि ९ अर्बले बढेको छ । असार १८ गते ४९ खर्ब ६३ अर्ब रुपैयाँ रहेको निक्षेप १९ गते ९ अर्बले बढेर ४९ खर्ब ७२ अर्ब रुपैयाँ पुगेको छ ।
त्यस्तै, सोही अवधिमा अन्य बैंक तथा वित्तीय संस्थाहरुको निक्षेप भने १ अर्ब रुपैयाँले बढेर ६ खर्ब ५८ अर्ब रुपैयाँमा पुगेको छ ।
बैंकहरुको नक्षेप १० अर्बले बढ्दा कर्जा लगानी भने २ अर्बले घटेको छ । असार १८ गते ४८ खर्ब ६४ अर्ब रुपैयाँ रहेको कर्जा लगानी १९ गते २ अर्बले घटेर ४८ खर्ब ६४ अर्ब रुपैयाँमा झरेको छ । सो समयमा वाणिज्य बैंकको कर्जा लगानी २ अर्बले घटेर ४३ खर्ब ३ अर्ब रुपैयाँ कायम भएको छ भने अन्य बैंक तथा वित्तीय संस्थाको ५ खर्ब ५९ अर्ब रुपैयाँमा स्थिर रहेको छ ।
सो समयमा बैंकको सीडी रेसियो ८३.२५ प्रतिशत रहेको राष्ट्र बैंकले जनाएको छ ।
