काठमाडौं । आइसिसी विश्वकप लिग–२ क्रिकेट अन्तरगत मंगलबारको खेलमा पपुवा न्युगिनी (पिएनजी) ले युएईलाई पराजित गर्दा नेपाललाई थप राहत भएको छ । लिगको पुछारमा रहेको पपुवा न्युगिनीले पाँचौ स्थानमा रहेको युएईलाई १३१ रनले पराजित गरेपछि नेपाललाई एक दिवसीय मान्यता जोगाउन थप सहयोग पुगेको हो ।
खेलमा पपुवा न्युगिनीका चाड सोपेरले पाँच विकेट लिएपछि २६३ रनको लक्ष्य पछ्याएको युएई ३४।२ ओभरमा सबै विकेट गुमाएर १३१ रनमात्र बनाउन सक्यो । त्यसअघि टस हारेपछि ब्याटिङमा आएको पीएनजीले ४९।१ ओभरमा सबै विकेट गुमाएर २६२ रनको योगफल खडा गरेको थियो ।
पीएनजीका सेसे बाउले ७६ बलमा ७४ रन बनाएका थिए । त्यसअघि ओपनर टोनी उराले ४३ बलमा ५१ रन बनाएका थिए । किप्लिन डोरिगाले ४२, गौडी टोकाले २८, कप्तान असद भालले २३ र चाड सोपेरले १४ रन बनाएका थिए ।
यूएईका कार्थिक मयप्पनले चार विकेट लिए । आर्यन लक्राले तीन विकेट लिँदा जहुर खानले दुई र रोहन मुस्तफाले एक विकेट लिए ।यूएईका ओपनर मुहम्मद वसिमले २४ रन बनाए । भ्रित्या अरविन्द र जहुर खानले समान २३ रन बनाउँदा आसिफ खानले २० र अलिसन सरफुले १४ रन बनाए । अन्यले दोहोरो स्कोर छुन सकेनन् ।
यूएईलाई सस्तैमा समेट्न सोपेरले १० ओभरमा एक मेडन राख्दै २५ रन खर्चिएर पाँच विकेट लिए । त्यस्तै सेमो कामेआ, नोर्मन भानुआ र रिले हाकुराले समान एक विकेट लिए ।यूएईले अब बिहीबार नेपालविरुद्ध प्रतिस्पर्धा गर्नेछ ।
नेपालले सोमवार लिग अन्तरगतको पहिलो खेलमा पपुवा न्युगिनीलाई ४ विकेटले हराउँदै विजयी शुरुवात गरेको थियो । पपुवा न्युगिनीले आज युएईलाई उसैको भुमिमा पराजित गरेको हो।
आजको जितसंगै पपुवा न्युगिनीले ३ खेलमा जित हात पर्दै ७ अंक जोडेको छ । युएईको २९ खेलबाट २९ अंक छ भने नेपालले २९ खेलबाट २८ अंक जोड्दै छैटौं स्थानमा छ ।
