काठमाडौं । रसुवास्थित भोटेकोशी नदीमा भदौ १० गते आएको विनाशकारी बाढीका घाइतेमध्ये एक भारतीय नागरिकसहित २१ जनाको त्रिभुवन विश्वविद्यालय शिक्षण अस्पताल, महाराजगञ्जमा उपचार भइरहेको छ ।
अस्पतालका प्रवक्ता डा. गोपाल सेढाईंका अनुसार बाढीपछि अस्पतालमा ल्याइएका ८१ घाइतेमध्ये हाल २१ जनाको उपचार जारी छ । उपचाररत घाइतेमध्ये पवित्र कार्की, पेमा तामाङ र चण्डिका श्रेष्ठ आईसीयूमा छन् भने मीनबहादुर श्रेष्ठ र राजेन्द्र भट्टको हाई केयर युनिटमा उपचार भइरहेको छ ।
अस्पतालबाट उपचारपछि हालसम्म ५५ जना डिस्चार्ज भएका छन् भने चार जनालाई अन्य अस्पतालमा उपचारका लागि पठाइएको छ । उपचारका क्रममा २५ वर्षीय कुशल मगरको मृत्यु भएको अस्पतालले जनाएको छ ।
यसैबीच, भोटेकोशी बाढी प्रभावित क्षेत्रमा सञ्चालन गरिएको खोज तथा उद्धार अभियानबाट हालसम्म १३ हजार ३९६ जनाको उद्धार गरिएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।
उद्धार गरिएकामध्ये तीन हजार ५३३ जना रसुवा, नुवाकोट र धादिङका ३९ वटा होल्डिङ सेन्टरमा सुरक्षित रूपमा आश्रय लिइरहेका छन् ।
प्राधिकरणका अनुसार बाढीपछि हालसम्म एक हजार ३५५ जनाको शव फेला परेको छ भने चार हजार ९९६ जना अझै सम्पर्कविहीन छन् । फेला परेका शवमध्ये ९८ जनाको सनाखत गरी आफन्तलाई बुझाइएको छ ।
बाढीबाट घाइते तथा प्रभावित गरी हालसम्म छ हजार ६७२ जनाले स्वास्थ्य उपचार सेवा लिएका छन्। विभिन्न अस्पतालमा उपचाररत ३२३ जनामध्ये २२८ जना डिस्चार्ज भइसकेका छन् ।
नेपाली सेनाबाट तीन हजार ३७९ जना र सशस्त्र प्रहरी बलबाट दुई हजार ९७० जनाले स्वास्थ्य उपचार सेवा लिएको प्राधिकरणले जनाएको छ । प्रभावित क्षेत्रमा सुरक्षा निकाय, स्थानीय तह तथा विभिन्न सरकारी र गैरसरकारी संस्थाहरू खोजी, उद्धार, उपचार तथा राहत व्यवस्थापनमा निरन्तर सक्रिय रहेका छन् ।
