चीनका अर्का एक अर्बपति बेपत्ता भएका छन् । चाइना रेसोनेन्स कम्पनीका अध्यक्ष तथा संस्थापक बाओ फ्यान ११ दिनदेखि सम्पर्कमा नरहेको कम्पनीले जनाएको छ । उनलाई चिनियाँ सरकारले बेपत्ता पारेको हुनसक्ने अन्तर्राष्ट्रिय सञ्चार माध्यमहरुले अनुमान छन् ।
चीनमा हाल भ्रष्टाचारविरुद्धको अनुसन्धान अभियान चलिरहेको छ । राष्ट्रपति सी चिङफिङ सत्तामा आएपछि सुरु भएको उक्त अभियानका क्रममा कयौं अर्बपतिहरु यसअघि पनि बेपत्ता पारिएका थिए । अहिले सोही क्रममा बाओलाई बेपत्ता पारिएको हुनसक्ने अन्तराष्ट्रिय सञ्चार संस्था रोयटर्सले जनाएको छ ।
बाओ संस्थापक रहेको रेसोनेन्स होल्डिङ्सले ११ दिनअघि नै उनी बेपत्ता भएको रिपोर्ट प्रहरीमा दर्ता गराएको थियो । तर उनको अवस्थाबारे हालसम्म केही थाहा भएको छैन । बेपत्ता हुनुअघि उनले भ्रष्टाचारको अनुसन्धानमा सरकारलाई सहयोग गरिरहेको कम्पनीको भनाइ छ ।
कम्पनीले आइतबार हङकङ स्टक एक्सचेञ्जमा जारी गरेको सूचनामा भनिएको छ, ‘बोर्डलाई थाहा भएको छ कि श्री बाओ हाल जनवादी गणतन्त्र चीनका केही अधिकारीहरूले गरिरहेको अनुसन्धानमा सहयोग गरिरहेका छन्।’
बाओ चीनका एक अग्रणी डिल–ब्रोकरका रुपमा परिचित छन् । डीडी, मीटुआन जस्ता ठूला कम्पनीहरु समेतलाई उनले सेवा दिइरहेका छन् । बाओको बेपत्ता भएसँगै उनका कम्पनीहरुको शेयरमूल्य निरन्तर रुपमा घट्दै आएको थियो जुन सोमबारदेखि थामिएको छ ।
कम्पनीका पूर्व अध्यक्ष कङ्ग लिनका पूर्वसहकर्मीको अनुसन्धानमा सहयोग गर्न अधिकारीहरुले बाओलाई यस महिनाको सुरुमा लगिएको रोयटर्स समाचार एजेन्सीले बताएको छ । चिनियाँ अधिकारीहरुले अग्रणी टेक्नोलोजी कम्पनीहरुमाथि कारबाही गरेको पृष्ठभूमिको रुपमा बाओको बेपत्ता हुनुलाई लिन सकिन्छ ।
बजार नियामकहरुले २०२० को अन्त्यतिर अलिबाबाका संस्थापक ज्याक मामाथि आलोचनात्मक टिप्पणी गरेका थिए । टिप्पणी गरिएपछि उनी तीन महिनाको लागि बेपत्ता भएका थिए । आन्ट फाइनान्सयिल नामक डिजिटल प्लेटफर्मको स्वीकृतिमा ढिलाई गरेपछि ज्याकले नियामकको आलोचना गरेका थिए ।
बाओकाे बेपत्ता पनि चिनियाँ राष्ट्रपति सी जिनपिङको भ्रष्टाचार विरोधी अभियानको एक भागको रूपमा उच्च प्रोफाइल चिनियाँ अधिकारीहरू बेपत्ता भएको घटनाहरूको श्रृंखला पछि आएको हो।
२०१५ मा मात्रै फोसुन समूहका अध्यक्ष गुओ गुआङचाङसहित कम्तीमा पाँच जना कार्यकारीहरू बेपत्ता पारिएका थिए । कम्पनीले पछि उनले व्यक्तिगत मामिलामा अनुसन्धानमा सहयोग गरिरहेको बतायो ।
२०१७ मा चिनियाँ(क्यानाडाली व्यापारी सियाओ जियानहुआलाई पनि पक्राउ गरिएको थियो। उनी चीनको सबैभन्दा धनी व्यक्ति थिए र गत वर्ष भ्रष्टाचारको आरोपमा जेल परेका थिए।
बाओलाई चीनको प्राविधिक उद्योगमा टाइटनको रूपमा हेरिन्छ, जसले यसको अनलाइन उपभोक्ता अर्थतन्त्रलाई आकार दिने धेरै व्यापारहरू कार्यान्वयन गरेको छ । मोर्गन स्टेनली र क्रेडिट सुइसमा बैंकिङ करियर गरेपछि उनले २००५ मा चाइना रेनेसान्स नामक वित्तीय संस्थाको स्थापना गरेका थिए ।
