काठमाडौं । निर्वाचन आयोगले मङ्सिर ४ मा हुने प्रतिनिधिसभा तथा प्रदेशसभा सदस्य निर्वाचनअन्तर्गत पहिलो हुने निर्वाचित हुने प्रणालीतर्फ मनोनयनपत्र दर्ताका लागि सम्बन्धित निर्वाचन क्षेत्रमा पुग्न नसक्ने उम्मेदवारका लागि कान्तिपथस्थित कार्यालयबाट सहजीकरण गरिरहेको छ ।
केही दिनयता अविरल वर्षा, बाढी, पहिरोलगायतका विपद्जन्य घटनाका कारण कतिपय स्थानमा आवतजावतमा समेत कठिनाइ भएका तथा सम्बन्धित दलबाट ढिलोगरी उम्मेदवारीको औपचारिकपत्र प्राप्त गरेका उम्मेदवारका कागजात सम्बन्धित निर्वाचन अधिकृतको कार्यालयमा पठाइ सहजीकरण भएको हो ।
मध्याह्न १२ः३० बजेसम्ममा प्रतिनिधिसभातर्फ ३४ र प्रदेशसभातर्फ ६० जनाले आयोगमा उम्मेदवारी दर्ताका लागि आफ्नो कागजात बुझाएको आयोगका सहप्रवक्ता ऋषिराम भुसालले जानकारी दिए ।
सहजीकरणका लागि उम्मेदवारको नागरिकताको प्रमाणपत्रको प्रतिलिपि वा मतदाता परिचयपत्रको प्रतिलिपि, मतदाता नामावलीमा नाम समावेश भएको निस्सा, प्रस्तावक र समर्थकको मतदाता परिचयपत्रको प्रतिलिपि वा मतदाता नामावलीमा नाम रहेको निस्सा, स्वघोषणा, दलको उम्मेदवारको हकमा औपचारिक पत्र, धरौटी जम्मा गरेको नगदी रसिद वा बैंक भौचर, उम्मेदवारको सम्पत्ति विवरणको सिलबन्दी खाम र उम्मेदवारको वैयक्तिक विवरण आयोगलाई बुझाउनुपर्नेछ ।
