काठमाडौं । कोरोना महामारी र यसले निम्त्याएको लकडाउनका कारण मोबाइल फोन प्रयोगकर्ताको संख्यामा व्यापक वृद्धि भएको छ ।
चालु आवको साउन देखि बैशाखसम्म नेपालमा ३२ अर्ब ९ करोड २९ लाख १७ हजार रुपैयाँ बराबरको मोबाइल फोन आयात भएको भन्सार विभागले हालै सार्वजनिक गरेको तथ्यांकले जनाएको छ ।
गत बर्षको तुलनामा यो बर्षको १० महिनामा १८ अर्ब बढीका मोबाइल सेट आयात भएको तथ्यांकमा देखिन्छ ।
यस अवधिमा नेपालमा सबैभन्दा बढि मोबाइल सेट चीनबाट भित्रिएका विभागको तथ्यांकमा उल्लेख छ ।
तथ्यांकअनुसार चीनबाट पछिल्लो १० महिनामा १९ अर्ब ५४ करोड रुपैयाँ बराबरका ५२ लाख ३३ हजार बढि थान मोबाइल सेट भित्रिका हुन् ।
यस्तै भारतबाट मात्रै यस अवधिमा नेपालमा ११ अर्ब १ करोड रुपैयाँ बढीका ८ लाख २९ हजार बढि सेट भित्रिएका हुन् ।
नेपालले सबैभन्दा बढि मोबाइल सेट आयात गर्ने देशहरुको तेस्रो र चौथो स्थानमा भियतनाम र अमेरिका रहेका छन् ।
उक्त देशहरुबाट नेपालले चालु आवको १० महिनामा क्रमशः १ अर्ब २४ करोड २ लाख र ६ करोड ११लाख ६४ हजार हजार रुपैयाँ बराबरका मोबाइल सेट भित्र्याएको छ ।
यस्तै नेपालले कोरिया, टर्की, युक्रेन, स्पेन, स्विजरल्याण्ड, स्वीडेलनलगायत ३५ बढी देशबाट मोबाइल सेट भित्राएको छ ।
