काठमाडौं । नेपालको सार्वजनिक ऋण २३ खर्ब रुपैयाँ पुगेको छ । अर्थ मन्त्रालय अन्तर्गतको सार्वजनिक ऋण व्यवस्थापन कार्यालयको तथ्यांकअनुसार आर्थिक वर्ष २०८०/८१ को फागुन महिनासम्ममा नेपालले भुक्तानी गर्न बाँकी ऋण २३ खर्ब ८८ अर्ब २६ करोड रुपैयाँ पुगेको हो ।
भुक्तानी गर्न बाँकी रहेको मध्ये ११ खर्ब ८५ अर्ब ५२ करोड रुपैयाँ आन्तरिक ऋण र १२ खर्ब २ अर्ब ७३ कारोड रुपैयाँ बाह्य ऋण रहेको कार्यालयको तथ्यांकमा जनाइएको छ । सो अवधिमा नेपालले १ खर्ब ७५ अर्ब ५१ करोड रुपैयाँ ऋण तिरेको छ । जसमध्ये आन्तरिक ऋणको सावाँब्याज गरि १ खर्ब ४६ अर्ब ६४ करोड रुपैयाँ र बाह्य तर्फको सावाँब्याज गरि २८ अर्ब ८६ करोड रुपैयाँ भुक्तानी गरिएको उल्लेख गरिएको छ ।
चालु आर्थिक वर्षको फागुनसम्ममा सरकारले थप २ खर्ब १८ अर्ब ६६ करोड रुपैयाँ ऋण लिएको छ । त्यसमध्ये १ खर्ब ६३ अर्ब ३१ करोड रुपैयाँ आन्तरिक ऋण र ५५ अर्ब ५५ करोड रुपैयाँ बाह्य ऋण रहेको तथ्यांकमा छ ।
