काठमाडौं । भूकम्प प्रभावितहरूको राहतका लागि चीन सरकारले थप २६ करोड रुपैयाँको सहयोग गर्ने भएको छ । नेपालका लागि चिनियाँ राजदूत छन् सोङ्ले मंगलवार सामाजिक सञ्जालमार्फत जाजरकोट भूकम्पबाट प्रभावित बनेकाहरूका लागि थप २६ करोड रुपैयाँको सहयोग गर्ने जानकारी दिएका हुन् ।
भूकम्प प्रभावितहरूको राहतका लागि उक्त सहयोग प्रदान गरिएको उनले बताएका हुन् । यस्तै, चीनको रेडक्रस सोसाइटीले १ लाख अमेरिकी डलर भूकम्पपीडितका लागि उपलब्ध गराउने राजदूत सोङ्ले जानकारी दिएका छन् ।
यसअघि चीनले १० करोड मूल्य बराबरको राहत सामग्री नेपाल पठाएको थियो ।
गत शुक्रवार राति जाजरकोट केन्द्रविन्दु भएर गएको भूकम्पपछि चीन सरकारले १० करोड मूल्य बराबरका सामग्री नेपाललाई उपलब्ध गराउने प्रतिबद्धता जनाएको थियो ।
