काठमाडौं । चितवनको गौतम बुद्ध क्रिकेट स्टेडियम निर्माणका लागि बागमती प्रदेश सरकारले लगानी गर्ने भएके छ । मंगलबार हेटौंडामा बसेको भरतपुर महानगरपालिका र बागमती प्रदेश सरकारबिचको बैठकमा उक्त रंगशाला निर्माणका लागि लगानी गर्ने सहमति भएको हो ।
उक्त बैठकले यस अघि भएका आर्थिक क्रियाकलाप र ऋण सम्बन्धी सम्पूर्ण जिम्मेवारी महानगरपालिका र संघीय सरकारले व्यवस्थापन गर्ने निर्णय गरेको छ । सो बैठकमा छिट्टै नै ठेक्का आह्वान गरी रंगशाला निर्माणको काम अघि बढाइने निर्णयसमेत गरिएको छ ।
महानगरपालिकाले तयार पारेको पहिलो चरणको लागत अनुमानको प्रस्ताव अनुसार काम सुरु गरिने छ । महानगरपालिकाले पहिलो चरणमा १० हजार दर्शक अट्ने प्याराफिट सहित क्रिकेट पिच र मैदान निर्माणको काम गर्ने निर्णय गरेको छ ।
उक्त कामका लागि महानगरपालिकाले तयार पारेको लागत अनुमान प्रस्ताव अनुसार ७५ करोड रुपैयाँ लगानी लाग्नेछ । उक्त लागत अनुमानको ७० प्रतिशत बागमती प्रदेश सरकारले व्यहोर्ने र ३० प्रतिशत रकम महानगरपालिकाले व्यहोर्ने सहमति सहित निर्णय भएको छ ।
यसअघि प्रदेश सरकारले बजेटमा नै रंगशाला निर्माणका लागि ५ करोड छुट्याइसकेको थियो ।
