काठमाडौं । नेपालले ८ विकेटले आजको खेल जितेको छ । मुलपानीस्थित क्रिकेट मैदानमा भएको आईसीसी टी–२० विश्वकप एशिया छनोट अन्तर्गतको आजको खेलमा नेपालले १७.१ ओभरमा २ विकेट गुमाएर लक्ष्य पुरा गरेको हो । यूएईले नेपाललाई १३५ रनको लक्ष्य दिएको थियो ।
नेपालका तर्फबाट आशिफ शेखले सर्वाधिक ६३ रनको योगदान दिएका थिए । त्यस्तै, रोहित पौडेल, गुल्सन झा र कुशल भुर्तेलले क्रमशः ३५, २२ र ११ रनको योगदान दिए ।
सेमिफाइनलमा यूएईसँग जितेबित्तिकै नेपाल आईसीसी टी–२० विश्वकप एशिया छनोटको फाइनलमा पुगेको छ । आजै कीर्तिपुरस्थित त्रिभुवन विश्वविद्यालयको क्रिकेट मैदानमा भएको सेमिफाइनलमा बहराइनसँग जितेर ओमान पनि फाइनल प्रवेश गरेको छ ।
फाइनलमा नेपाल र ओमानबीच खेल हुनेछ । आजको जितसँगै नेपाल र ओमान आईसीसी टी–२० विश्वकपका लागि छनोट भएका छन् ।
