काठमाडौं । विराटनगरस्थित पशुपति सुनचाँदी पसलका सञ्चालक विश्वजीत जाना ४० केजी चाँदीसहित पक्राउ परेका छन् । उनलाई नेपाल प्रहरी, सशस्त्र प्रहरी र विराटनगर भन्सार कार्यालयबाट खटिएको संयुक्त टोलीले विराटनगर ११ पिचरास्थित पसलबाटै पक्राउ गरेको हो ।
उक्त पसलमा छापा हानेर तस्करीको चाँदीसहित उनलाई नियन्त्रणमा लिइएको प्रहरीले जनाएको छ । बरामद गरेको चाँदीका गरगहना अहिले भन्सार कार्यालयमा राखिएको विराटनगर भन्सार कार्यालयले जनाएको छ ।
चाँदीको एकिन परिमाण भने तौलिएपछि मात्रै थाहा हुने कार्यालयले जनाएको छ ।
