काठमाडौं । बजारमा गएको ५ अर्ब रुपैयाँ भदौ महिनामा राष्ट्र बैंकमा फर्किएको छ । राष्ट्र बैंकले सार्वजनिक गरेको विवरण अनुसार विभिन्न समयमा बजारमा गएको सो बराबरको रकम रष्ट्र बैंकमा फर्किएको हो ।
बैंकका अनुसार साउन मसान्तसम्मा ५ खर्ब ९९ सय अर्ब रुपैयाँ बराबरको नोट बजारमा रहेको थियो । भदौमा सो रकम घटेर ५ खर्ब ९४ अर्ब रुपैयाँ चलनचतिमा रहेको छ । यो रकम बैंक वित्तीय संस्था र आम मानिससँग रहेको पैसा हो ।
यो अवधिमा राष्ट्र बैंकको जगेडा तथा बचत कोषमा रहेको रकम भने घटेको छ । साउनमा ४ खर्ब २० अर्ब रुपैयाँ रहेको रकम भदौमा ७ अर्ब रुपैयाँले घटेर ४ खर्ब १३ अर्ब रुपैयाँमा झरेको छ ।
त्यस्तै, राष्ट्र बैंकले सुनचाँदीमा लगानी गर्ने रकम ३ अर्बले घटेर ८४ अर्ब ८८ करोड रुपैयाँमा झरेको छ । साउनमा यस्तो रकम ८७ अर्ब ८८ करोड रहेको राष्ट्र बैंकले जनाएको छ ।
