काठमाडौं । विराटनगर महानगरले विद्युत् प्राधिकरणसँग बिजुलीको खम्बाको भाडा र सम्पत्ति कर मागेको छ । नेपाल विद्युत प्राधिकरण विराटनगर वितरण केन्द्रलाई पत्र लेख्दै महानगरले विद्युतीय खम्बा र सम्पत्ति कर तिर्न अनुरोध गरेको हो ।
प्रमुख प्रशासकीय अधिकृत राजेन्द्र पराजुलीले बिहीबार प्राधिकरणलाई पठाएको पत्रमा सम्पत्ति कर ३ करोड ८१ लाख ८५ हजार ७३३ रुपैयाँ तिर्न बाँकी रहेको उल्लेख छ । महानगरमा २३ हजार १५१ वटा बिजुलीका पोल छन् । महानगरले ती पोलको सात वर्षको ६ करोड १९ लाख २८ हजार ९२५ रुपैयाँ भाडा बुझाउन ताकेता गरेको हो ।
महानगले प्राधिकरणसँग बिजुलीको पोलको भाडा र इन्टरनेट सेवा प्रदायकलाई दिएबापत भएको आम्दानीको १० प्रतिशत बहाल कर तिर्न पनि ताकेता गरेको छ ।
प्राधिकरणले सडक बत्तीको भाडा तिर्न महानगरलाई ताकेता गरेपछि महानगरले प्राधिकरणलाई पनि सम्पत्ति कर र पोल भाडा तिर्न ताकेता गरेको बुझिएको छ ।
प्राधिकरणका अनुसार महानगरले सडक बत्तीको मात्रै ८ करोड ६६ लाख ८ हजार ७ सय ७ रुपैयाँ तिर्न बाँकी छ । उक्त बक्यौता तिर्नका लागि प्राधिकरणले असोज २१ गते गारखापत्रमा ४५ दिने सूचनासमेत निकालेको थियो ।
