काठमाडौं । गत आर्थिक वर्ष २०७९/८० मा ३८ अर्ब ४० करोड ७५ लाख रुपैयाँ प्रत्यक्ष वैदेशिक लगानी प्रतिबद्धता गरिएको छ । उद्योग विभागका अनुसार ३२७ वटा उद्योगमा उक्त रकम प्रतिवद्धता आएको हो ।
सुरुदेखि हालसम्म भने ४ खर्ब ५६ अर्ब ३८ करोड १० लाख रुपैयाँ प्रत्यक्ष वैदेशिक लगानी प्रतिबद्धता गरिएको छ । गएको असारमा मात्र ५४ परियोजनाका लागि ३ अर्ब ७१ करोड रुपैयाँ वैदेशिक लगानी प्रतिबद्धता गरिएको थियो ।
गत वर्ष ७४ परियोजनाका लागि साझा सदस्यता सम्झौता र ६४ परियोजनाका लागि प्रविधि हस्तान्तरण सम्झौता भएको छ । त्यसका लागि १६ अर्ब २४ करोड ९३ लाख रुपैयाँ सम्झौता भएको विभागले जनाएको छ ।
गत एक वर्षको वैदेशिक लगानी प्रतिबद्धताले १७ हजार १२ जनाले रोजगारी सिर्जना हुने बताइएको छ । हालसम्म गरिएको वैदेशिक लगानी प्रतिबद्धताले ३ लाख ९ हजार १ सय ३२ जनाले रोजगारी प्राप्त गर्ने प्रतिबद्धतामा उल्लेख छ ।
अघिल्लो आर्थिक वर्ष २०७८/७९मा १३ अर्ब ६६ करोड रुपैयाँ लाभांश बापत गएको देखिएको छ। त्यस्तै रोयल्टीमार्फत भने ४ अर्ब ६४ करोड रुपैयाँ गएको देखिएको हो। गत आर्थिक वर्षभरिमा १८ अर्ब ३० करोड रुपैयाँ स्वीकृत गरेको हो।
