काठमाडौं । रंगको पर्व फागुन पुर्णिमा अर्थात होली विदेशमा बस्ने नेपालीले पनि हर्ष उल्लास पुर्वक मनाएका छन् । असत्यमाथि सत्यको विजयको प्रतीक, पारिवारिक एवं सामाजिक एकताको पर्वका रुपमा लिइने होली पर्व अमेरिकाको टेक्सासस्थित डिएफडव्लु फोर्ट वर्थमा बस्ने नेपाली समुदायले भव्य रूपमा मनाएका हुन् ।
टेक्सासबाट कान्ति नेपालले जनाए अनुसार,२६ परिवारका एक सय १० नेपाली एकै ठाउँमा भेला भएर होली मनाएका हुन् । मध्याह्न १२ बजे भेला भएका नेपालीले एक आपसमा अबिर, रंग दल्नुका साथै मिठामिठा नेपाली परिकार बनाएर छ घण्टासम्म हर्षोल्लासका साथ होली मनाएका थिए ।
त्यस क्रममा सहभागी नेपालीले नेपाली गीत सङ्गीतमा नाचगान समेत गरेका थिए । पढाइ र कामको सिलसिलामा विदेशमा बस्नु परेपनि नेपाली धर्म, संस्कृति र परम्परा कायम राख्दै प्रबासमा रहेका नेपाली बीच भातृत्व र आपसी सम्बन्ध बिस्तारमा यस्ता पर्वले महत्त्वपूर्ण भूमिका खेल्ने सहभागी समीर आचार्यले बताए । आगामी दिनमा यस्ता पर्व अझ बृहत रूपमा मनाउने लक्ष्य लिइएको उनको भनाई छ ।
