काठमाडौँ । चैत ३ गतेसम्म खाली हुने सबै निर्वाचन क्षेत्रमा एकैपटक उपनिर्वाचन हुने भएको छ । निर्वाचन आयोगले राष्ट्रपति र उपराष्ट्रपति निर्वाचिनपछि खाली हुने क्षेत्र र चितवन २ मा एकै दिन उपनिर्वाचन गर्ने तयारी गरेको हो ।
फागुन २५ गते हुने राष्ट्रपति र चैत ३ को उपराष्ट्रपति निर्वाचनबाट निर्वाचित सांसदको पद रिक्त हुने व्यवस्था छ। रिक्त सबै स्थानमा एकै पटक उपनिर्वाचन गर्ने आयोगले जनाएको छ । यसअघि आयोगले चितवन २ मा वैशाख १० गते उपनिर्वाचन गर्ने जनाएको थियो ।
रिक्त हुने तीनवटै क्षेत्रमा एकै दिन निर्वाचन गर्ने तयारी गरिरहेको आयोगले जनाएको छ ।राष्ट्रपतिमा कांग्रेसकाबाट रामचन्द्र पौडेल र एमालेबाट सुवासचन्द्र नेम्वाङ उम्मेदवार छन् । पौडेल तनहुँ १ र नेम्वाङ इलाम २ बाट प्रतिनिधिसभा सदस्यमा निर्वाचित भएका थिए ।
राष्ट्रपति निर्वाचनपछि यी दुईमध्ये एक क्षेत्र खाली हुनेछ। उपराष्ट्रपतिको उम्मेदवारको टुंगो भने लागेको छैन।
