काठमाडौं । यातायात व्यवस्था कार्यालय मोटरसाइकल, काठमाडौंले फागुनभित्र मोटरसाइकलको कर बुझाउनेलाई ५ वर्षको जरिवाना छुट दिने व्यवस्था गरेको छ । कार्यालय बिहीवार सुचना जारी गर्दै सो जानकारी गराएको हो ।
आर्थिक वर्ष २०७०र७१ देखि आर्थिक वर्ष २०७५–७६ सम्म तोकिए बमोजिमको कर तथा नवीकरण समेत भुक्तानी नगरेका सवारी धनीले यही फागुन मसान्तभित्र कर बुझाएमा जरिवाना छुट दिने कार्यालयले जनाएको छ ।
कार्यालयले विगत आर्थिक वर्षहरुदेखि कर तिर्न बाँकी भएका सवारी धनीहरुलाई कर तथा नवीकरण समयमै भुक्तानी गरेर लाभ लिन आग्रहसमेत गरेको छ ।
साथै, प्रयोग नभएका सवारी साधनहरु चालु आर्थिक वर्षसम्मको कर नवीकरण तथा जरिवाना रकम भुक्तानी गरी विधिवत् लगतकट्टा गर्न पनि विभागले अनुरोध गरेको छ ।
