काठमाडौं । जीवन बीमाको पहुँच ३९.१२ प्रतिशत जनसंख्यामा पुगेको छ । बीमा समितिले सार्वजनिक गरेको विवरण अनुसार वैशाख मसान्तसम्म कुल जनसंख्याको ३९.१२ प्रतिशतले जीवन बीमा गरेको देखाएको हो ।
यो सङ्ख्या म्यादी, लघुम्यादी र वैदेशिक रोजगार जीवन बीमालेख सहितको हो । गत वर्षको सोही अवधिमा बीमाको दायरामा आएको जनसंख्या २६.९२ प्रतिशत रहेको थियो । समितिको तथ्यांक अनुसार समीक्षा अवधिसम्म १ करोड १७ लाख ९५ हजार ८ सय ४० जना बीमाको दायरामा आएका छन् । नेपालको जनसंख्यालाई ३ करोड २ लाख मानेर उक्त पहुँचको दर गणना गरिएको हो ।
म्यादी र बैदेशिक रोजगार जीवन बीमालेख बाहेक ४८ लाख १९ हजार ९ सय ९५ जनाले जीबन बीमा गरेका छन् । म्यादी जीवन बीमालेख सहित भने कुल बीमितको संख्या १ करोड १७ लाख ९५ हजार ८ सय ४० जनामा बीमाको पहुँच पुगेको छ । यो ३६.२९ प्रतिशत हो ।
म्यादी र वैदेशिक रोजगार जीवन बीमालेखलाई हटाउँदा भने अहिलेसम्म जनसंख्याको १५.९९ प्रतिशतले मात्रै जीबनबीमा पोलिसी किनेको बीमा समितिले जनाएको छ ।
बैशाख मसान्तसम्ममा बीमा कम्पनीले कुल १ खर्ब ४१ अर्ब ५९ करोड रुपैयाँ बराबरको बीमाशुल्क संकलन गरेका छन् । यो गत वर्षको तुलनामा १४.६५ प्रतिशतले बढि हो ।
