काठमाडौं । नेपाल टेलिकमले एमपिओएस रिचार्जमा बोनश उपलब्ध गराएको छ । कम्पनीले मङ्सिर १८ गते मङ्गलबारदेखि आगामी पुस १७ गतेसम्मका लागि एमपिओएस रिचार्जमा बोनश उपलब्ध गराएको हो ।
टेलिकमका प्रिपेड तथा पोष्टपेड मोबाइल रिचार्ज गर्नका लागि रिचार्ज कार्डको अतिरिक्त अन्य विभिन्न वैकल्पिक उपायहरू अपनाउन सकिन्छ ।
यसका लागि विभिन्न दरका रिचार्ज कार्डका साथै मोवाइल प्वाइन्ट अफ सेल (एमपिओएस) र नमस्ते पे, इसेवा, खल्ती, आइएमई पेलगायतका डिजिटल वालेटहरू विकल्पको रूपमा रहेका छन् ।
ग्राहकवर्गले सहजरूपमा कम्पनीका सेवाहरूमार्फत परिवारजन तथा मित्रवर्गसँग सञ्चार सम्पर्कमा रहिरहन सहज होस् भन्ने उद्देश्यले विभिन्न विद्युतीय माध्यमबाट टपअप गर्न सकिने व्यवस्था कम्पनीले गरेको छ । यसका साथै सहज तवरले अविछिन्न रूपमा सञ्चार सेवा उपभोग गर्न ब्यालेन्स सकिएको अवस्थामा समेत प्रिपेड मोबाइल प्रयोगकर्ताहरूको लागि नमस्ते सापटीको सुबिधा कम्पनीले उपलब्ध गराएको छ ।
प्रिपेड मोबाइल प्रयोगकर्ताहरूले स्टार्ट टाइप गरी १४७७ मा सन्देश पठाएर अथवा *1477# डायल गरी १ छनौट गरेर सापटी लिन सक्नेछन् ।
