काठमाडौं । काठमाडौं उपत्यकामा वैशाख १६ देखि जारी निषेधाज्ञा अब भने केहि सहज हुने भएको छ । सवारी साधनको सञ्चालन समेत खुला गर्ने गरी आज काठमाडौं उपत्यका तीन जिल्लाका प्रमुख जिल्ला अधिकारीहरू बैठक बस्ने भएका छन् ।
उपत्यकामा संक्रमण घट्दै गएको र बन्दाबन्दीले तल्लोस्तरका नागरिकस्तरको जीवन यापन थप कष्टकर बन्दै गएकोले सरकारले निषेधाज्ञा खुकुलो बनाउन लागेको हो ।
आज दिउँसो बस्ने सीडीओहरूको बैठकले सवारी साधनमा जोरविजोर प्रणाली लागू गर्ने तयारी गरिएको छ । स्मार्ट लकडाउने गर्ने तयारी गरिरेको सरकारले निषेधाज्ञालाई थप खुकुलो बनाउँदै असार ८ गतेदेखि सपिङ मल, होलसेल, फेन्सी, भाँडा पसल खुलाउने तयारी थालेको हो ।
साथै यो अवधिमा खाजा र चिया पसल पनि खुलाउनेबारे छलफल भएको बताइएको छ । यी पसलहरू खुला गरिएपनि ग्राहकहरूले बसेर खाजा तथा चिया भने खान पाउने छैनन् ।
सरकारले पछिल्लो पटक लागू गरेको निष्ोधाज्ञा भोलिदेखि सकिने भएकोले आज दिउँसो सीडीओहरूले बैठक बस्न लागेका हुन् । यसअघि सीडीओहरूको बैठकले असार ७ पछि स्मार्ट लकडाउन गर्ने निर्णय गरेको थियो । अबको निषेधाज्ञा थप एकहप्ता खुकुलो बनाएर त्यसपछिको रिपोर्टलाई हेरेर थप प्रक्रिया अघि बढाउने निर्णय गरेको हो ।
हाल जारी निषेधाज्ञा केही खुकुलो भएपनि तत्काल निषेधाज्ञा भने हट्ने छैन ।
