काठमाडौं । भोटेकोशी र त्रिशूली नदीमा आएको भीषण बाढीपछि रसुवा, नुवाकोट, धादिङ र चितवनलगायत प्रभावित क्षेत्रमा बागमती प्रदेश सरकारका मुख्यमन्त्री किरण थापा मगरसहित मन्त्रीहरू उद्धार, राहत तथा पुनःस्थापनामा सक्रिय भएका छन् ।
बागमती प्रदेश सरकारका प्रवक्ता एवं भौतिक पूर्वाधार विकास मन्त्री भरतबहादुर केसीका अनुसार बाढी प्रभावित नागरिकको जीवनरक्षा, खोज तथा उद्धार, राहत, उपचार, अस्थायी आवास र सुरक्षित आवागमनलाई उच्च प्राथमिकतामा राख्दै प्रदेश सरकार परिचालित भएको छ ।
मुख्यमन्त्री किरण थापा मगर, सम्बन्धित मन्त्रीहरू, प्रमुख सचिवसहित कर्मचारी, सुरक्षाकर्मी तथा स्वास्थ्यकर्मीहरू प्रभावित क्षेत्रमा स्थलगत रूपमा खटिएको प्रदेश सरकारले जनाएको छ ।
प्रदेश सरकारले रसुवा र नुवाकोटका लागि दुई/दुई करोड रुपैयाँ तथा धादिङ र चितवनका लागि ५०/५० लाख रुपैयाँ गरी कुल तीन करोड रुपैयाँ उपलब्ध गराएको छ । बाढीमा मृत्यु भएकाका परिवारलाई प्रतिमृतक २५ हजार रुपैयाँका दरले राहत दिने निर्णयसमेत गरिएको छ ।
भदौ ११ गते मुख्यमन्त्री किरण थापा मगरको नेतृत्वमा प्रदेश सरकारको टोली रसुवाको धुन्चेतर्फ पुगेको थियो। मुख्यमन्त्रीकै उपस्थितिमा रसुवामा सर्वपक्षीय बैठक आयोजना गरी संघ, प्रदेश र स्थानीय तहबीच उद्धार तथा राहत कार्यमा समन्वय गरिएको थियो ।
यस्तै नुवाकोटमा प्रदेश सरकारका मन्त्री तथा प्रदेशसभा सदस्यहरूको सहभागितामा यातायात व्यवस्था, पूर्वाधार तथा वैकल्पिक मार्ग निर्माण, स्वास्थ्य, राहत सामग्री वितरण र हवाई उद्धार समन्वयका लागि पाँचवटा कार्यदल गठन गरिएको छ ।
बाढीका कारण ४० भन्दा बढी पुल भत्किएपछि वैकल्पिक यातायात सञ्चालनलाई तीव्रता दिइएको छ । धुन्चेदेखि महावीरसम्म, चौघडादेखि काठमाडौंसम्म र विदुरदेखि काठमाडौंसम्म निःशुल्क बस सेवा सञ्चालनमा ल्याइएको प्रदेश सरकारले जनाएको छ ।
प्रदेश सरकारले प्रभावित क्षेत्रमा राहत सामग्री पठाउनुका साथै अस्पताल, यातायात र टेलिकम सेवा सञ्चालनका लागि रसुवाको धुन्चेमा इन्धनसमेत उपलब्ध गराएको छ। प्रभावित क्षेत्रमा थप १० जना प्रदेश सेवाका अधिकृत कर्मचारीलाई पनि खटाइएको छ ।
प्रवक्ता एवं मन्त्री केसीले मुख्यमन्त्री किरण थापा मगरसहित मन्त्रिपरिषद्का सबै सदस्य प्रभावित नागरिकको साथमा रहेको र उद्धार, राहत तथा पुनःस्थापनाका काममा कुनै कमी हुन नदिने प्रतिबद्धता व्यक्त गरेको जानकारी दिए ।
