काठमाडौं । खाद्य व्यवस्था तथा व्यापार कम्पनीले हालसम्म ३७ हजार क्विन्टल धान खरिद गरेको जनाएको छ । यो वर्ष कम्पनीले ७ लाख ३६ हजार क्विन्टल खरिद गर्ने लक्ष्य लिएको छ । जसका लागि २ अर्ब ५६ करोड बजेट छुट्याइएको छ ।
खाद्य कम्पनीका १३ वटा कार्यालयबाट देशैभर २५ जिल्लाका किसान र कृषि सहकारीबाट धान खरिद गरिने कम्पनीको खरिद विभागले जनाएको छ । विभागका अनुसार कार्यालयले स्थानीय सरकारसँग समन्वय गरेर धान खरिद गर्ने भएको छ ।
पोखरामा जेठोबुढो धान र जुम्लामा मार्सी धान र बाँकी २३ जिल्लाबाट मोटा र मध्यम जातको धान खरिद गरिने छ ।
यस्तै यो वर्ष कम्पनीले मोटा धानको प्रतिक्विन्टल ३ हजार ४ सय १०.५१ रुपैयाँ निर्धारण गरेको छ ।
यस्तै, मध्यम धानको प्रतिक्विन्टल ३ हजार ५ सय ८०.६२ रुपैयाँ न्यूनतम समर्थन मूल्य तोकेको छ ।
