मध्यपुर थिमी नगरपालिकाले सञ्चालन गर्दै आएको नेपाल कोरिया मैत्री नगरपालिका अस्पतालले पछिल्लो चार बर्षमा लामो फड्को मारेको छ । शिक्षा, स्वास्थ्य र सम्पदामा फोकस हुने हाम्रो सुरुवाती सोचनै हो । त्यही अनुसार स्वास्थ्यमा हामीले उल्लेख्य काम गर्न सफल भएका हौं ।
हामी नेतृत्वमा आउँदा यस अस्पतालको नाम कोरिया नेपाल मैत्री अस्पताल थियो । नामको सुरुमा नेपाल राख्न नै ६ महिना लाग्यो । सम्पूर्ण प्रक्रिया पुरा गरेर अस्पताल सञ्चालन गर्न थालेपछि यसले विकासको गति समात्यो ।
पहिले र अहिले
२०७४ को रेकर्ड हेर्नुभयो भने अस्पतालमा दैनिक ५ सय जति बिरामी आएको देखिन्छ । आजको रेकर्ड पल्टाउनु भयो भने त्यो बढेर ९ सय पुगेको छ ।
चार वर्षअघि यसको अवस्था ‘प्राइमरी हेल्थ सेन्टर’ जस्तो मात्रै थियो । बिरामीलाई प्राथमिक उपचार गरिदिएर अन्यत्र पठाउने ‘रिफर सेन्टर’ जस्तो थियो । तर पछिल्लो समय त्यो अवस्था ठ्याक्कै उल्टो भएको छ । भक्तपुरका अन्य अस्पतालहरुले यहाँ ‘रिफर’ गर्छन् ।
हामी आउँदा यहाँ ६५ जना स्टाफ थिए । अहिले ३ सय ७२ जना पुगेका छन् । गाइनोको २४ घण्टे सेवा दिएका छौं । त्यसकारण अहिले मध्यपुरका ९५ प्रतिशत गाइनोसँग सम्बन्धितहरु यहीँ आउँछन् ।
पहिला ८० प्रतिसत ल्याब टेस्ट बाहिर पठाइन्थ्यो । अहिले ९५ प्रतिशत यहीँ हुन्छ । र, अरु अस्पतालको ल्याब टेस्टको काम पनि यहाँ आइरहेका छन् । पहिला ५० बेडको अस्पताल थियो । अहिले १ सय २ बेड छन् । तत्कालै २ सय बेडको हुँदैछ ।
त्यसबेला फार्मेसी वर्षको १५ लाखमा ठेक्का लगाइएको थियो । हामीले आफैं सञ्चालन गरेपछि ६ महिनामा अढाई करोड मुनाफा गर्यौं । अहिले हर्ट, आँखा, दाँत, छारे रोग आदिको उपचार गौरवगर्न लायक ढंगले भइरहेको छ । धेरै विशेषज्ञहरु हामीसँग हुनुहुन्छ । क्याथ ल्याब सञ्चालन गरिरहेका छौं ।
पहिला नर्सको तलब ८ हजार र डाक्टरको तलब १८ हजार रहेछ । हामी आएपछि नर्सको न्यूनतम २२ हजारदेखि २७ हजार र डाक्टरको ३५/४५ हजारदेखि १ लाखसम्म पुर्याएका छौं । लकडाउनमा धेरै अस्पतालले आधा तलब दिने र जनशक्ति कटौती गरे । हामीले यस्तो गरेनौं । यी कारणले यहाँ काम सिकेर जाने चलन हटाएर अन्यत्र नाम चलेका र क्वालिटी दिन सक्नेहरु यता आउन थालेका छन् । अर्थात सम्पूर्ण रुपमा अस्पतालको ‘इमेज’ परिवर्तन भएको छ ।
अहिलेसम्म हामीले २५/३० करोड लगानी गरिसकेका छौं भने सहयोगी हातहरुले पनि उत्तिकै सहयोग गरेर अस्पतालको स्तरउन्नति गर्न सहयोग गर्नुभएको छ ।
कोभिड उपचारमा नमूना
हामी आफैंले पीसीआर ल्याब सञ्चालन गरेका छौं । अहिले पिसिआर ल्याब सञ्चालन गर्ने एक मात्र नगरपालिका हो, यो । हामीसँग १० वटा भेन्ट्रिलेटर छन् भने एचडीयू (हाइ डेफिन्डेन्ट युनिट) २५, आइसियू २४ बेड छन् ।
अक्सिजन प्लान्ट पनि जडान गरेर सञ्चालन गरिरहेका छौं । अहिले दैनिक १ सय ९२ लाख लिटर अक्सिजन उत्पादन गर्न सक्ने सामर्थमा छौं । अन्य अस्पताललाई आवश्यकता अनुसार अक्सिजन सप्लाई समेत गरिरहेका छौं ।
निकट भविष्यमा के हुँदैछ ?
यो छोटो अवधिमा धेरै काम भएका छन् । ठूला रोगको उपचार गर्न थालेका छौं भने भक्तपुरमा सबैले रिफर गर्ने अस्पताल बनाएका छौं । निकट भविष्यमा २ सय शैय्याको अस्पताल हुनेछ । यसलाई ३ सय पुर्याउने लक्ष्य हो ।
स्वास्थ्य बीमा गर्नेको संख्या ४५ हजार जति पुगेको छ भने यसलाई बढाउँदै लाने योजनामा काम गरिरहका छौं । ८० प्रतिशत नगरवासीको स्वास्थ्य बीमा गर्नेछौं । मध्यपुरलाई नि:शुल्क स्वास्थ्य उपचार हुने नगर बनाउने मेरो लक्ष्य हो ।
सिटी स्क्यानका लागि टेन्डर भइसकेको छ भने एमआरआई मेसिन ल्याउँदैछौं । अर्को महत्वपूर्ण कुरा, ब्लड बैंक सञ्चालनमा ल्याउँदैछौं । त्यसैगरी चारवटा डाइलासिस मेसिन आउँदैछन् । यसपटक मात्र हामी २० करोड रुपैयाँ खर्चेर यस अस्पताललाई अत्याधुनिक बनाउँदैछौं । त्यसैगरी पीसीआर नर्सिङ कलेज सञ्चालन गर्ने लक्ष्य छ ।
(नेपाल कोरिया मैत्री नगरपालिका अस्पतालका अध्यक्ष समेत रहेका मध्यपुर थिमि नगरपालिकाका मेयर श्रेष्ठसँग गरिएको कुराकानीमा आधारित)
