काठमाडौं । सरकारले निषेधाज्ञाको समय लम्ब्याउने तयारी थालेको छ । पछिल्ला दिनमा कोरोनाको संक्रमण भयावह बढ्दै गएपछि काठमाडौंलगायत उपत्यकाका तीनै जिल्ला प्रशासन कार्यालयहरू वैशाख ३० गतेसम्म निषेधाज्ञा जारी गर्ने तयारी शुरु गरेको हो ।
काठमाडौं जिल्ला प्रशासन कार्यालयका प्रमुख जिल्ला अधिकारी कालीप्रसाद पराजुलीले आज वा भोलि बैठक बसेर निषेधाज्ञाको मिति लम्ब्याउनेदेखि अहिले सञ्चालनमा आएका क्षेत्रलाई समेत सीमित पार्ने लागिएको बताए ।
‘कोभिड–१९ को प्रभाव बढ्दै गएको छ, यसलाई मध्येनजर गरेर अझ कडा गर्नुपर्ने अवस्था सिर्जना भइसकेकाले हामीले निषेधाज्ञाको मिति लम्ब्याउन लागेका हौं,’ उनले भने ‘अहिले म अनुगमनमा हिडिरहेको छु, आम नागरिक तथा सरोकारवालाबाट सरकारले जारी गरेको निर्देशन पालना भए नभएको हेर्दैछु ।’
बिहान कोटेश्वरदेखि हिडेको अनुगमन बसपार्क हुँदै अहिले उनी बालाजुमा भएको बताए । निषेधाज्ञाको लागि जारी गरिएको निर्देशन पालना भएको छ कि छैन, अहिले बाटोबाटोमा हेरेर गर्दैछु । यसपछि सरकारी कार्यालयलेखि बैंक, वित्तीय संस्था तथा बीमालगायतका क्षेत्रको पनि यसरी नै अनुगमन हुनेछ ।’ निषेधाज्ञाको प्रभावकारी कार्यान्वयनको लागि म आफै अनुगमनमा निस्केको पराजुलीले बताए ।
अब बस्ने बैठकले हाल जारी गरिएको निषेधाज्ञाको समीक्षा गर्दै अर्को निर्णय गर्न लागिएको पनि उनले बताए । उपत्यकामा निषेधाज्ञा सुरु भएपछि दैनिक निषेधाज्ञाका नयाँ नयाँ शर्तहरू आइरहेका छन् । मन्त्रिपरिषद्को बैठकले आवश्यक परेमा निषेधाज्ञाको समय २ हप्तासम्म तोक्नका लागि जिल्ला प्रशासन कार्यालयलाई अनुमति दिएको थियो ।
अहिले अत्यावश्यकी वस्तु सहित खाद्यान्न, फलफूल तथा तरकारीका पसल बिहान बेलुका सञ्चालन गर्न दिइएको छ । यस विषयमा समेत पुर्नविचार गर्नुपर्ने हुन सक्ने उनले बताए । सरकारी कार्यालय र बैंक तथा वित्तीय संस्थाका कर्मचारीको आवतजावतमा पनि थप कडाइ गर्ने तयारी गरिएको छ । राष्ट्र बैंक तथा बीमा समितिले एक चौथाइमात्र कर्मचारी राखेर सेवा सुचारु गर्न यस अघि नै आफू मातहतका संघ संस्थालाई निर्देशन दिइसकेको छ ।
