काठमाडौं । एकदिवसीय अन्तर्राष्ट्रिय क्रिकेटको वरीयतामा नेपालले एक स्थान सुधार गरेको छ । अन्तर्राष्ट्रिय क्रिकेट परिषद् आईसीसीले बुधबार सार्वजनिक गरेको नयाँ वरियतामा नेपालले १ स्थान सुधार गर्दै १५ औं स्थानमा उक्लिएको हो ।
पछिल्लो बरियता अनुसार नेपालले आईसीसी क्रिकेट विश्वकप लिग टू मा आफूभन्दा एकस्थान माथि रहेको ओमानलाई पछि पारेको छ । लिग टूका पछिल्ला १२ मध्ये ११ खेल जितेको नेपाल यी खेल जित्नुअघि १९ औं स्थानमा थियो ।
नेपाल १७ औं, १६ औं हुँदै १५ औं स्थानमा उक्लिएको हो । लिग टू खेलका अन्य मुलुक मध्ये ओमान १६ औं, नामिबिया १७ औं, अमेरिका १८ औं, युएई १९ औं र पपुवा न्युगिनी २० औं स्थानमा छन् ।
नेपाल भन्दा अघि नेदरल्यान्ड्स १४ औं, जिम्बावे १३ औं र स्कटल्यान्ड १२ औं स्थानमा छन् । भारत वरीयताको पहिलो स्थानमा छ भने अष्ट्रेलिया दोश्रो तथा न्युजिल्याण्ड तेश्रो स्थानमा रहेका छन् ।
