काठमाडौं । जनता समाजवादी पार्टीकी प्रमिला कुमारी यादवले आफ्नो उपराष्ट्रपति उम्मेदवारी फिर्ता लिएकी छिन् । उनले सोमबार सुचना जारी गर्दै उपराष्ट्रिपति उम्मेदवारी फिर्ता लिग्दै जनता समाजवादी पार्टी कै रामसहाय यादवलाई समर्थन गर्ने निर्णय गरेकी हुन् ।
उपराष्ट्रपतिका लागि विभिन्न आन्दोलन र संघर्षमा सक्रिय रुपमा लागेका रामसहाय यादव उपराष्ट्रपति पदका लागि सक्षम र योग्य उम्मेदवार रहेको बताएकी छन् । प्राविधिक रुपमा उक्त पदका लागि आफ्नो नाम रहेपनि प्रतिवद्धताका साथ रामसहाय यादवलाई समर्थन गर्ने प्रमिलाकुमारीले बताएकी छन् । प्रमिलाकुमारीले फागुन २७ गते उक्त पदका लागि आफूले मनोनयन दर्ता गराएकी थिइन् ।
चैत ३ गते हुने उपराष्ट्रपति निर्वाचनका निर्वाचन अधिकृतको कार्यालयले आइतबार अन्तिम नामावली प्रकाशन गर्दै चार जनाको उम्मेदवारी कायम रहेको जनाएको छ । जनता समाजवादी पार्टीबाट उम्मेदवारी दिएका दुईजनाकै उम्मेदवारी कायम रहेकाे छ ।
