विश्व बैंकले नेपालको स्वास्थ्य प्रणाली सुदृढ गर्न १० करोड डलर (करिब १३ अर्ब) अनुदान स्वीकृत गरेको छ । शुक्रबार बैंकको कार्यकारी निर्देशक बोर्डले ‘नेपाल गुणस्तर स्वास्थ्य प्रणाली कार्यक्रम’ सञ्चालनका लागि उक्त अनुदान स्वीकृत गरेको हो ।
कार्यक्रमले स्वास्थ्य सेवाको गुणस्तरमा सुधार ल्याउने र स्वास्थ्य बीमाको कभरेज बढाउने लक्ष्य लिएको छ । साथै, उक्त कार्यक्रमले कोशी र गण्डकी प्रदेशमा स्वास्थ्य आपतकालमा तत्कालै सेवा दिन सक्ने गरि स्वास्थ्य सेवा प्रणालीको क्षमता अभिवृद्धि गर्नेछ ।
‘स्वास्थ्यलाई प्राथमिकतामा राखेर लगानी गरे नेपालले सुधारिएको स्वास्थ्य स्थिति, उत्पादकत्वमा वृद्धि र आर्थिक विकास लगायतका कयौं लाभ उठाउन सक्छ ’, माल्दिभ्स, नेपाल र श्रीलङ्का का लागि विश्व बैंकका देशीय निर्देशक फारिस हदाद–जेभोर्सले भने । विश्व बैंकले स्वास्थ्य प्रणाली नीति र योजना र सेवा प्रवाहलाई गुणस्तरीय बनाउने नेपालको लक्ष्यलाई समर्थन गर्ने उनले बताए ।
स्वास्थ्य तथा जनसंख्या मन्त्रालयले स्वास्थ्य बीमा बोर्डसँग समन्वय गरि उक्त कार्यक्रम संघीय स्तरमा र कोशी तथा गण्डकी प्रदेशका प्रदेश र स्थानीय स्तरमा सञ्चालन गर्नेछ । जसले नेपालको स्वास्थ्य क्षेत्र रणनीतिक योजना २०२२–२०३० को रणनीतिक उद्देश्य हाँसिल गर्न मद्दत पुग्नेछ । उक्त योजनाले स्वास्थ्य प्रणालीको दक्षता र प्रतिक्रियाशीलता अभिवृद्धि, स्वास्थ्यमा दिगो फाइनान्सिङ, सामाजिक सुरक्षा प्रवद्र्धन र गुणस्तरीय स्वास्थ्य सेवामा सबैको समान पहुँच बनाउने जस्ता लक्ष्य लिएको छ ।
‘पहुँच र गुणस्तरका मुद्दाहरूलाई सम्बोधन गर्न र बलियो सार्वजनिक स्वास्थ्य क्षेत्र सिर्जना गर्न, कार्यक्रमले संघीयता कार्यान्वयनलाई समर्थन गर्दछ र स्वास्थ्य क्षेत्रमा परिणामहरूको लागि नेपालको पहिलो कार्यक्रमको निर्माण गर्दछ ’ दक्षिण एशिया क्षेत्रका लागि स्वास्थ्य, पोषण र जनसंख्या अभ्यास प्रबन्धक डा फेङ झाओले भने । ‘यस कार्यक्रम मार्फत प्राप्त परिणामहरू अन्य क्षेत्राधिकारहरूमा विस्तार गर्न सकिन्छ ’ उनले भने ।
उक्त कार्यक्रमका लागि फाइनान्सिङ स्वास्थ्य आपतकालीन तयारी र प्रतिक्रिया (एचईपीआर) बाट हुनेछ । एचईपीआर ट्रस्ट कोषले योग्य राष्ट्रहरू र क्षेत्रहरूलाई मानिसहरूमा महामारीको प्रभावहरू अनुमान गर्न, रोक्न, प्रतिक्रिया दिन र कम गर्ने क्षमतालाई बलियो बनाउन मद्दत गर्दछ ।
