काठमाडौं । ९ मिहनामा माछापुच्छ्रे बैंकले १ अर्ब ३५ करोड नाफा गरेको छ । आर्थिक वर्ष २०७९/८० को तेस्रो त्रैमाससम्ममा बैंकले सो बराबरको नाफा कामएको हो । अघिल्लो आर्थिक वर्षको सोही अवधिमा १ अर्ब ५५ करोड नाफा गरेको बैंकको नाफा यो अवधिमा तुलनात्मक रुपले घटेको छ ।
बैंकको नाफामा गिरावट आउनुमा निष्क्रिय कर्जा अनुपातको वृद्धि मुख्य कारण रहेको देखिएको छ । अघिल्लो वर्षको चैतसम्म ०.८७ प्रतिशत रहेको यो अनुपात यो त्रैमासमा आइपुग्दा २.३७ प्रतिशत पुगेको छ । सोही कारण बैंकले इम्पेरिमेन्ट चार्जबापत छुट्याउनुपर्ने रकम ८१ करोड ९५ लाख पुगेको छ । अघिल्लो वर्ष यस्तो रकम २४ करोड ९ लाख रुपैयाँ मात्रै थियो ।
एक वर्षको अवधिमा बैंकको व्यवसाय वृद्धि सामान्य बढ्दा बैंकको खुद व्याज आम्दानीमा भने राम्रो सुधार देखिएको छ । चैतसम्म बैंकले ४ अर्ब १३ करोड रुपैयाँ खुद ब्याज आम्दानी गरेको छ । अघिल्लो आर्थिक वर्ष उक्त आम्दानी ३ अर्ब ६० करोड रहेको थियो ।
चैत मसान्तसम्ममा बैंकले १ खर्ब ४५ अर्ब निक्षेप संकलन गर्दा १ खर्ब २८ अर्ब रुपैयाँ रकम ऋण परिचालन गरेको छ ।
